Daot ouch mèt aon de Limburgse Taolquiz

Veldeke organiseert same mèt De Limburger de Limburgse Taolquiz. Vaanaof zaoterdag 21 september kint ederein de vraogelies online invölle. Wee mèt deit krijg 25 vraoge te beantwoorde euver Limburgse wäörd, gezègkdes en get feitekinnes. Dat zien allemaol miekäösvraoge boebij me ’t good antwoord moot keze oet drei veurgegeve meugelekhede. Nao ’t invölle krijg me medein te zien wie väöl vraoge tot me good had. Dao zien leuke, verrassende en soms ouch get meueleker vraoge bij. Meh ’t is e plezeer um mèt te doen!

Maak kans op de finale (same mèt Limburgse prominente)

Wee mèt deit maak kans um oetgenudeg te weure veur de groete finale die geit plaotsvinde in ’t gebouw vaan de Media Gróp Limburg in Sittard op 8 oktober aonstaonde. De bèste 40 kandidate koume daoveur in aonmèrking en die strije um d’n hoofpries, ‘n ballonvaart veur 2 persoene bove Limburg. Daoneve nump ouch ’n aontal prominente Limburgers deil aon de finale die in ’n apaarte categorie um de prominentepries strije. Daobij zien oondermie Suzan Seegers, Henk Hover, Niek Dirkx  en Jo Huijen (Spik en Span), Dyanne Sleijpen en Ivo Rosbeek.

Wach neet mèt invölle!

De vraogelies vaan de veurrunde steit nog tot zondag 29 september online. Meh geer hoof neet zoe lang te wachte mèt invölle. Es geer noe medein op de volgende link klik, komp geer rechstreeks bij de vraoge terech. ’t Invölle kos uuch huugtens 10 menute, ouch al umtot d’n tied dee geer krijg um eder vraog te beantwoorde beperk is tot 20 seconde. ’t Is dus ’n kwestie vaan vlot beslisse. Ouch es geer neet per se mèt wèlt doen aon de finale, is ’t toch de meujte weerd um de vraoge te beantwoorde. Gaot mer ins good deveur zitte en klik op deze link nao de vraogelies.

Väöl succes!

 

← Ga terug