Dreikwaart vaan de inwoeners van de provincie sprik Limburgs

Vaan alle volwasse inwoeners vaan de provincie Limburg sprik 67% vloeiend ein vaan de Limburgse dialekte. Daoneve gief nog ins 11% aon ’t Limburgs wel te spreke meh gebrekkeg. In totaal sprik dus 78% vaan de Limburgse bevolking – al daan neet gebrekkeg – ‘ne vörm vaan dialek. Veur ’t mierendeil is dat ’t dialek vaan hun huidege woenplaots, veur ’n minderheid ’t dialek vaan ’n ieder woenplaots (10%) en veur ’n ander deil ‘nen oonderein vaan dialekte (24%)

Dat is de belaankriekste oetkoms vaan ’n oonderzeuk wat in opdrach vaan Veldeke is oetgeveurd door oonaofhaankelek oonderzeukburo R&M Matrix oet Sittard oonder ’n representatief steekproof vaan ruim 1.100 inwoeners vaan de provincie vaan 18 jaor en awwer.

Dat liekent ’n oetstekende score veur ’t Limburgs es veer dat vergelieke mèt ’t dialekgebruuk in ander regio’s in Nederland. Meh dao zit ’n adder oonder ’t dialekgraas. Es veer ’t vloeiend Limburgs spreke oetdrökke nao leeftijdscategorieje zien veer ’t volgende beeld:

Limburgs spreke nao leeftied

Dao-oet weurt dudelek tot ’t veural de awwere zien die nog in groete getalle Limburgs spreke en tot die veerdegheid stèlselmaoteg aofnump naomaote de jonger gróppe in beeld koume. Boe bij de Limburgers vaan 65 jaor en awwer nog 74% vloeiend Limburgs sprik is dat percentage bij de jongste gróp vaan 18-34 jaor gesloonke nao 52%.

Oet de ciefers weurt ouch dudelek tot inkel ‘n klein minderheid vaan 2% vaan de Limburgers ‘t dialek neet sprik én ouch neet begrip.

Veur väöl mie oetkomste vaan ‘t Veldeke oonderzeuk kint geer hei klikke.