De stand vaan ‘t Limburgs
In opdrach vaan Veldeke Limburg heet oonaofhaankelek oonderzeukburo R&M Matrix oet Sittard begin 2021 ‘n oonderzeuk oetgeveurd oonder ‘n representatief steekproof vaan de Limburgse bevolking vaan 18 jaor en awwer. De oetkomste vaan dat oonderzeuk geve e good beeld vaan wie ‘t deveur steit mèt de Limburgse taol. Daoneve is in ‘t oonderzeuk ouch de bekindheid en de beeldvörming euver Veldeke es dialekorganisatie mètgenome. Op deze pagina prizzentere veer die oetkomste oonderverdeild in ‘n deil hoofstökke. Door op ‘n hoofstök te klikke krijg geer de details vaan de rizzeltaote te zien.
- Dreikwaart vaan de Limburgers sprik Limburgs
Vaan alle volwasse inwoeners vaan de provincie Limburg sprik 78% Limburgs. 67% gief aon ein vaan de Limburgse dialekte vloeiend te spreke en nog ins 11% zeet wel Limburgs te spreke meh daan gebrekkig. Dat liekent hiel get meh de situatie weurt anders es veer bekieke wie ‘t spreke vaan Limburgs oonder jonger lui droet zuut. Klik hei veur mie details. - Opvallende regionaal versjèlle in ‘t spreke vaan Limburgs binne de provincie
Me zouw dinke tot euveral in de provincie ongevier eve väöl Limburgs weurt gesproke, meh dat bliek neet te kloppe. Es veer de provincie oonderverdeile in veer regio’s (Westelek Zuid Limburg, Oostelek Zuid Limburg, Midde Limburg en Noord Limburg) daan blieke dao opvallende versjèlle tösse te bestoon. Klik hei veur mie details. - WhatsAppe in ‘t Limburgs
Limburgs spreke is ein dink, Limburgs sjrieve is weer get anders. Mennegein veult ziech geremp door ‘t gebrek aon dudelekheid euver de spelling vaan de Limburgse taol. Meh daodoor liet neet ederein ziech weerhawwe. Vaan de jonger Limburgers tösse 18 en 35 jaor sjrijf mie es de helf dialek es ze WhatsApp gebruke mèt femilie of vrun. Klik hei veur mie details. - Limburgers positief euver Limburgse taol
Mie es 80% vaan de inwoeners vaan Limburg steit positief tegeneuver de Limburgse taol. E kleiner aondeil vaan 16% zeet neutraal tegeneuver ‘t Limburgs te stoon oonderwijl mer ‘n klein minderheid vaan 4% negatief (3%) of hiel negatief (1%) dao tegeneuver steit. Ouch hei doen ziech versjèlle veur aofhaankelek vaan de leeftied van de oondervraogde Limburgers. Klik hei veur mie details. - De touwkoms vaan de Limburgse taol
Wie kieke de Limburgers aon tege de touwkoms vaan de Limburgse taol? Dinke ze tot in de touwkoms mie of minder Limburgs gesproke zal weure? En wie väól belaank hechte ze aon ‘t behaajd vaan die taol? En vinde ze tot in de kinderdaagverblieve Limburgs gesproke moot kinne weure? ‘t Antwoord op al die vraoge kint geer vinde door hei te klikke. - Veldeke bekindste Limburgse taolorganisatie
In ‘t oonderzeuk is ouch naogegaange wie ‘t steit mèt de bekindheid vaan versjèllende Limburgse taolorganisaties. Veldeke kump dao-oet es mies bekind nao väöre. Wat dat betröf heet ‘t bekans hoonderjaoreg bestoon vaan de vereineging zien spore naogelaote. Ouch is gevraog nao ‘t beeld wat Limburgers höbbe vaan Veldeke. Dat lievert ‘n aontal intrèssante associaties op. Klik hei veur mie details. - Algemein conclusies vaan ‘t oonderzeuk
Veer zètte de belaankriekste conclusies vaan ‘t oonderzeuk en de dao-oet aofgeleide consequenties veur touwkomsteg beleid vaan Veldeke op ‘n rij. Geer kint ze hei bekieke.
Es geer ‘t compleet teksverslaag vaan ‘t Veldeke oonderzeuk – boe-in nog väöl mie details genoteerd stoon – wèlt leze, daan kint geer daoveur hei klikke.