Veldeke bekindste Limburgse taolorganisatie

Veldeke Limburg kump oet ‘t oonderzeuk nao väöre es de bekindste Limburgse taolorganisatie. Wat dat betröf heet ‘t bekans hoonderdjaoreg bestoon vaan de vereineging zien spore naogelaote.

De naombekindheid vaan Veldeke en vaan ‘n deil ander taolorganisaties is mèt ‘n twietal vraoge vastgelag. Op de ierste plaots is gevraog nao de zoegenaomde spontaan bekindheid, dat wèlt zègke tot de respondente zelf de naome móste notere vaan Limburgse taolorganisaties die ze kinne. Veur alle dudelekheid: de respondente wiste veuraof neet wee d’n opdrachgever aan ‘t oonderzeuk waor.

De spontaan naombekeindheid vaan Veldeke bedreug daan 20%, wat beteikent tot eine op de vijf Limburgers Veldeke kint neume. Ander organisaties boevaan veroonderstèld weurt tot ze ziech inzètte veur ‘t behaajd en bevordere vaan ‘t Limburgs zien:

Nog ander organisaties wie ‘t Hoes veur de Kunste, kal Plat, de VVV, de Raod veur ‘t Limburgs, ‘t Meertensinstituut, ‘t LGOG, de VLDN en professor Leonie Cornips es persoen weure wel geneump meh score minder es 0,5%.

Daonao is vaan e vijftal organisaties naogegaange wie ‘t mèt hun geholpe bekindheid steit, dat wèlt zègke wat veur antwoord me gief es de naome vaan die organisaties weure veurgegeve. Oonderstaonde tabel gief de oetkomste weer:

Geholpen bekendheid Limburgse taalorganisaties

Veldeke springk qua naombekindheid ouch in dit geval es bèste droet. Bekans de hèlf vaan alle Limbugers heet op z’n mins vaan Veldeke oets gehuurd oonderwijl ein derde de vereineging good tot e bitsje zeet te kinne. ‘t Hoes veur de Kunste volg op ruimen aofstand (68% noets vaan gehuurd) en Levende Talen Limburgs es ouch de Raod veur ‘t Limburgs dao weer ruim achter (mie es 80% noets vaan gehuurd). Talep is dudelek ‘t mins bekind: mie es 90% vaan de Limburgers heet dao nog noets vaan gehuurd.

Bij Veldeke kint mèt rech de vraog gestèld weure: ís ‘t glaas haaf vol of haaf leeg? Es um en naobij de hèlf vaan de Limburgers nog noets vaan de vereineging gehuurd heet, daan kint me neet blij zien mèt die oetkoms. Este vaan d’n andere kant de vergelieking mèt de ander taolorganisaties maaks, daan zouwste ‘t glaas ouch haaf vol kinne neume. Sjrijnender weurt dees vraog es veer bezien wie de bekindheid vaan Veldeke oonderverdeild nao de versjèllende leeftijdscategorieje droet zuut.

Bij de Limburgers oonder de 35 jaor heet bekans dreikwaart nog noets vaan Veldeke gehuurd. Es Veldeke dus get aon zien naombekindheid wèlt doen daan zal ‘t zaak zien bij de jonger Limburgers te beginne. Qua regio scoort Veldeke ‘t bèste in Zuid West Limburg (Mestreech/Sittard e.u.) mèt 37% good of e bitsje bekind en Midde Limburg (Remund/Weert e.u.) mèt 29%, oonderwijl Noord Limburg (Venlo/Venray e.u.) mèt 20% en Oostelek Zuid Limburg (Heerle/Kèrkraoj e.u.) mèt 21% de rij slete.