Echter Dictee op 24 mieërt

Veldeke Krink Ech zal bönnekort väör de ieëste kieër ‘n Echter Dictee organisere. Det zal plaats vènje op zóndigmiddig 24 mieërt a.s. vanaaf 13.30 oer in de groate zaal van ’t Cultuurhoes aan de Plats in Ech.  Aanmelje óm mit te doon, kan nog.

Mitdoon kan in principe ederein: inwoners van de gemèndje Ech-Zöstere, mer ouch anger belangstèllendje oet de regio of van dao boete. Zeker ouch awd-inwoners zeen van herte oetgenuuedigdj. De titel “Echter Dictee” wiltj in eder geval neet aangaeve det allein Echtenieëre zoewe kènne insjrieve. Of wae allein Echs spruk. Ederein, kleine of groate leefhöbber van de Limburgse taal en van de spelling d’rvan kan dus mitdoon.

Waat is den waal typisch, waat dit dictee tót Echter Dictee maaktj? De zinne zólle in Echter dialek waere väörgelaeze. En es criterium väör de jurering deentj de spelling oet ‘t “Brònsgreun Beukske”.

Bie ’t mitdoon zeen d’r 2 mäögelikheje:  deilnumme mit jurering. ’t Dictee weurtj den nao ’t sjrieve opgehaoldj en door de jury naogekeke. Dees deilnummers kómme in aanmerking väör ‘n 1e, 2e, 3e of 4e plaats. Degene mit de minste foute volges de jury, kan nao hoes gaon mit de “Echter Krakeling-wisseltrofee” en moog dem ’n jaor lank in bezit haoje. De oetslaag van de jury stuitj neet ter discussie.

Bie ’t mitdoon zónger jurering kan ederein zelf zien of häör dictee naokieke aan de handj van de ónger de pauze geprojecteerdje gooj sjriefwieze.

De organiserendje wirkgroep van Veldeke Krink Ech haoptj det ‘t ’n gezellige wedstried zal waere ónger ’t motto: “Wae sjriftj, dae bliftj”. Aanmelje kan allein via de site: www.veldekekrinkech.nl.

← Ga terug