Eijsde-Mergraote liert zien kinder plat praote mèt e Vekantiebook

In september 2016 is de gemeinte Eijsde-Mergraote begonne mèt “Kal Plat”, de campagne veur dialek- en taoloontwikkeling. Doel vaan dess campagfne is um mie bewusweurding te creëre euver ’t positief effek vaan ’t gebruuk vaan ’t dialek. Zoonder daobij ’t dialek aon iemes te wèlle oplègke. Ambitie vaan de gemeinte is noe zjus um aon te toene tot ’t spreke vaan Nederlands en dialek prima same goon. Oonder de neumer vaan dees campagne weure versjèllende activiteite oontwikkeld, boebij dialek spreke oonder de aondach weurt gebrach.

Kindervekantiebook

Ein vaan die activiteite is ’t oontwikkele vaan e “Kal Plat” kindervekantiebook. E zomerbook mèt späölselkes, puzels, teikeninge, räödselkes en tips veur oetstepkes in de umgeving. D’n teks in ’t book is deils in ’t Nederlands, deils in de dialekvariante vaan dees gemeinte. ’t Book is bedoeld veur kinder oet oonder- en bovebouw vaan de basissjaole en d’n inhaajd heet altied te make mèt thema’s die in de gemeinte leve,  wie de Brónk, Vastelaovend, processies, vakwèrkhoezer en zoe wijer.

Versjèllende dialekte in de gemeinte

Alle basissjaolkinder vaanaof gróp 3 kriege vaan de gemeinte Eijsde-Mergraote zoe “Kal Plat”- vekantiebook cadeau. Eder dörp in de gemeinte heet zien eige dialek en al die dielakvariante koume trök in ’t vekantiebook; ’n aontal inwoeners heet die stökskes teks in hun eige dialek vertaold. Veur de mieste kinder zalle die tekste in ’t dialek mesjiens neet zoe gemekelek te leze zien. Daorum is aon inwoeners ouch gevraog deen teks in te spreke, zoetot de versjèlle tösse de dialekte ouch te hure zien. De ingesproke tekste kinne beluusterd weure op de website vaan de gemeinte.

 

← Ga terug