Europees Manifes tege seksisme ouch in ’t Limburgs

Op de website vaan ’t Human Rights Channel vaan de Raod vaan Europa steit oonder mie e manifes tege seksisme. Dat manifes is in väöl Europese taole te leze en bezunder is tot dao ouch regionaol taole bij gerekend weure. Vaandao tot Veldeke Limburg ’t verzeuk kraog um te zörge veur ’n Limburgse vertaoling vaan dat manifes. Daan deit ziech metein e probleem veur want wat veur dialek vaan ’t Limburgs moos dat weure; dao waor mer plaots veur éi Limburgs.

Nao euverlègk met de provincie en de Raod van Europa is beslote um veur ’t Mestreechs te keze. Neet allein umtot Mestreech noe eine kier de hoofstad vaan Limburg is en umtot nog väöl lui Mestreechs praote, meh ouch umtot de Mestreechter taol ein vaan de bès gedocumenteerde is. Zoe zouwe veer in eder geval discussies euver de spelling kinne veurkoume. De Veldeke Krink Mestreech waor zoe vruntelek de vertaoling te verzörge.

Allèh, mèt excuis aon alle ander Limburgse dialekte, steit noe de Mestreechsen teks tege seksisme op de website vaan de Raod vaan Europa: “Seksisme, zuug ‘t, beneum ‘t, stop ‘t“. Geer kint kieke wie dat oetzuut door hei te klikke. Geer zalt daan ouch zien tot dao ‘ne quiz te vinde is boemèt geer kint naogoon of geer zelf mesjiens ouch e bisje seksistisch zeet. Meh dat zal toch wel neet….

← Ga terug