Fèlm euver Vleisboeket op NPO 2 Extra

D’n documentaire “Ein dingk” euver de Limburgse vastelaovendsband Vleisboeket is koumenden dinsdag 16 juni vaanaof 18.30 oor te bekieke op NPO 2 Extra. Daoneve is de fèlm ouch geselecteerd door ‘t  VPRO platform 2DOC Makers van Morgen en is op eder gewins momint te bekieke (en te beluustere!) op www.2doc.nl en dao is ouch ‘n interview te bekieke mèt de maakster vaan de fèlm, Maud van der Varst.

Vleisboeket is/waor ’n band die veural oonder jonger vastelaovendsvierders furore heet gemaak mèt stevege beats en spetterende shows.  Documentairemaakster Maud van der Varst volgde de veurbereiinge veur ‘t groet aofsjeidsconzèr in 2018 en verzamelde mie es 70 oor beeldmateriaol.

Dat materiaol woort gemix mèt awwer opnames van optrejjes vaan de gróp, oondermie bij de Sjtasiefestasie Remunj en bij “D’n 11 vaan d’n 11e” in Mestreech. En die beelde woorte weer  aofgewisseld mèt oetgebreide interviews mèt alle zes lede vaan de band, die vertèlde euver wie ’t gekoume waor, vaanaof ’t allerierste begin, wie ze in achteraofzäölkes van dörpskaffees koelek plaots hadde um mèt z’nen zesse op ’t podium te stoon tot optrejjes veur tiendoezende lui.

Veldeke waor eine vaan de sponsors vaan de fèlm.