Festival Vocallis 2025 zèt Limburgse taol op meziek
Meziekfestival Vocallis en Veldeke Limburg höbbe sinds einege jaore e partnersjap. In ’t kader daovaan nump Vocallis eder jaor e Limburgstaoleg oonderdeil in zie program op. Deze kier is dat e gediech vaan Toos Schoenmakers oet Posterholt wat aonslut bij ’t thema vaan ’t festival 2025: “Geluk”. Bezunder is tot dat gediech door ‘ne componis speciaol veur ’t festival op meziek weurt gezat.
Conzèr in de Kopermeule in Vaols
De gediechte vaan toos – in ‘t Limburgs en in ‘t Nederlands – zien op meziek gezat door Ute Jobes en weure gezoongen door Vasiliki Chanou, sopraan, en Pascal Pittie, tenor. Ze weure begeleid op piano door Alice Hendriks. Tickets kosten € 15,89 en kinne bestèld weure via de website vaan ‘t Festival.
‘t Conzèr vint plaots op vriedag 31 oktober a.s. in de Kopermolen in Vaols vaanaof 19.30 oor. Neve de compositie-opdracht weurt oonder mier operèttemeziek vaan Frans Léhar en Edouard Künneke vertolk. Ouch ‘t bekinde Wolgaleed steit op ‘t program.
Hei volg ‘t gediech wat toos veur ‘t Festival Vocallis sjreef:
aope port nao gelök
Nach sjoelt ’t lèste nachlich aan mien vinster
mer in ’t daaglich hoes al glinster
de port sjarneert geaolied aope
sjprik van troos en vruijd en haope
maerelleed klink heilend
riedel nao riedel blie deilend
de port nao gelök wied aope
zomerzón waert oetgeneud
sjpant sjnaore van wermte en leefde
baove ’t sjpelend kindj
wat ilke daag greutsj nuuj sjatte vindj
ouge deile de vruijd zo zorgeloos blie
geweun jao heel geweun alles in harmonie
de port nao gelök wied aope
noe sjlaagwerk ’t ritme van ’t naojaor bringk
battert, roefelt, roesj, zjwieg sjtil
de natuur in kleure verdrink
dan eine paukesjlaag en de wintjer begint
sjarnere sjoere, ies blink, gèn wäörd te vinge
mer ein hert wat zingk
de port nao gelök wied aope
toos schoenmakers