Festival Vocallis en Veldeke Limburg goon samewèrke

Veldeke Limburg geit de koumende jaore samewèrke mèt Festival Vocallis. Vocallis is e meziekfestival wat eder naojaor tientalle conzèrs beejt die in Limburg plaotsvinde. In ’t festival späölt vocale meziek ’n centraal rol. Daomèt kump ouch e bezunder accent te ligke op de leedtekste die weure oetgeveurd.

Tot bij die tekste de taol vaan de regio boe ’t festival ziech aofspäölt ’n rol späölt, heet Vocallis al einegen tied oetgedrage en in häör program geïncorporeerd. Neet veur niks gief Vocallis eder jaor ‘nen diechter de opdrach e gediech te sjrieve in de Limburgse streektaol. Neet veur niks programmeert Vocallis mèt regelmaot artieste die in ’t Limburgs zinge. Neet veur niks weure thematische oetveuringe geprizzenteerd roond Limburgse artieste.

Veldeke hech draon die belaankstèlling veur de Limburgse taol te oondersteune en te stimulere en heet daorum beslis tot ’n strategische samewèrking mèt Festival Vocallis. Tijdens ’t festival 2021 heet dat oonder mie gerizzelteerd in:

• E prachteg gediech vaan Sef Peeters oet Venlo “Ich hald van dich”, wat aonsloot bij ’t festival thema “Leefde” en wat op meziek is gezat door componis Willemn Zuilen, ouch oet Venlo. ’t Gediech is tijdens ’t conzèr op 23 oktober 2021 in ’t Asta Theater in Beek door tenor Pascal Pittie en sopraan Daphne Ramakers gezoonge en begeleid door Enmrico Delamboye op piano. Geer kint hei luustere nao ‘n geluidsopnaome vaan dat leed.
• Harry Bordon vertelconzèr. Umtot Harry Bordon 100 jaor geleie gebore is heet L1 radiomaker Henk Hover e program samegestèld roond de componis vaan “Wie sjoën ós Limburg is”. De Limburgse troubadours Linda Zijlmans (Venlo), Ivo Rosbeek (Heerle), Harold K (Gelaen) en Linda Koolen (Zöstere) höbbe same mèt Henk Hover e vertèlconzèr geprizzenteerd euver leve en werk vaan Harry Bordon, zien leedsjes gezoonge, aongevöld mèt eige leedsjes. E sjoen conzèr, reurend, gezoonge in de versjèllende dialecte die de zengers eige waore. ’t Conzèr woort twie kier oetgeveurd, eine kier in Gelaen en eine kier in Venlo. Dit conzèr is opgenome door L1 radio en in aoflieveringe oetgezonde tijdens ’t program Plat-eweg. Luuster  en kiek hei nao e fragmint vaan ‘t conzèr.

Veldeke Limburg kiek denao oet ouch veur de koumende jaore de Limburgse taol ’n belaankrieke plaots te geve in ’t Festivalprogram en zal ziech bemeuje um dao ‘n gepasde invölling aon te geve.