Festival Vocallis verklaank Mestreechs gediech vaan Wim Kallen
In ’t kader vaan de samewèrking tösse Meziekfestival Vocallis en Veldeke Limburg voont op 27 oktober in de Kopermeule in Vaols e bezunder conzèr plaots. Vocallis gaof aon componis Egbert Derix opdrach um e gediech vaan Wim Kallen getiteld ‘Stèlte is d’n deeptste klaank’ op meziek te zètte. ’t Rizzeltaot vaan die compositieopdrach woort vocaal vertolk door Marion Vervoort, boebij Derix häör begeleidde op piano.
Umtot Wim Kallen zie gediech ouch in de Nederlandse taol had gesjreve (‘Stilte is de diepste klank’) góng Egbert Derix de oetdaoging aon um zoewel de Mestreechse es de Nederlandse teks aofzunderlek op meziek te zètte. Dat lieverde twie versjèllende compoisties op boebij de Limburgse variant bekans es vaanzelf geet leefleker kloon es de Nederlandse, dee ’ne mie jazzy klaank mètkraog.
’t Waor veur d’n derde kier tot Vocallis bezunderen aondach besteide aon de Limburgse taol. In ieder jaore woorte al gediechte vaan Har Sniekers en Fer Peeters verklaank. Ouch de koumede jaore zalle Vocallis en Veldeke Limburg blieve samewèrke. De Limburgse teks vaan ‘t gediech vaan Wim Kallen geit es volg:
Stèlte is d’n deepste klaank
d’n theaterzaol is vol geloupe
iemes hoos en kröchelt
pak ziech ‘ne menta
de spanning stijg
’n bladzij vaan ’t programbeukske
weurt umgeslage
’t is ‘t allerlèste momint veur aonvaank
de paukenis steit op sjerp
de snaore vaan de herp zien gespand
’t conzèr begint mèt ’n intense stèlte
wie stèller ’t weurt
wie mie me kint hure
stèlte is d’n deepste klaank
nao ’t conzèr rije veer
voldoon en in stèlte nao hoes
in eus woenkamer op ’t parkèt
zörge de puutsjes vaan Pieke
veur e ritmisch wijske
Pieke haolt z’ne reem
heer wèlt indelek nao boete
veer loupe mèt häöm e rundsje nao de vijver
d’n aovend is al e tiedsje gevalle
en componeert zie slotakkoord
oonder eus rösbaank aon ‘t water
huurste ’t graas greuje
iech pak dien hand
veer kinne us noe zoeväöl jaore
veer kieke us aon
en luustere hand in hand
nao ’t zwiege vaan de maon
wie stèller ’t weurt
wie mie me kint hure
stèlte is d’n deepste klaank
Geer kint luustere en kieke nao de oetveuring vaan ‘t door componis Egberet Derix getoenzètte gediech, zoe wie ‘t door sopraan Marion Vervoort is gezoonge, door hei te klikken.
