Finale Veldeke Declamatiewedsjtried

In ein good gevöld Dok6 in Panningen vónj zaoterdigmiddig 20 mei de finale plaats van de declamatiewedsjtried veur 28 Limburgse basissjoolkinjer van groep 3 t/m 8. Oet de ganse provincie wore de winners van de veurrunj nao deze theaterzaal gekómme óm häör gedich te laote heure en zeen aan ‘t publiek en natuurlik aan de viefkoppige jury. Waat ‘n kanjers zote d’r weer tösse en waat ‘n flair höbbe die kinjer! ‘t Woor geniete van veurdrachte euver sjoolperikele, favoriete of minder geleefde beeste, leefhöbberieje, en van waat me es kindj zoal mit kan make. ‘t Publiek kreeg te heure waem de baas is in hoes, wie de bèdtied kèn waere opgerèk, det se limmenaad toch ech eers mós aanlinge en wie rammele van de hónger klink, óm d’r ‘n paar te numme.

Prizzentater Hans Jacobs sjtèlde de kinjer op ‘n veurtreffelike meneer gerös es die toch waal get zenuwechtig wore en leet ‘t programma lekker flot verloupe. Hae zorgde d’rveur det ze allemaol häör verdeende applaus krege. Ónger ‘t juryberaod zóng winnares van ‘t TVK 2017 Fiorenza Ruijters oet Valkeberg -ouch al mit ‘n flitsende prizzentasie- veer liedjes, wo-ónger Zomer en Proud Mary.

‘n Gemekkelike klus woor ‘t neet veur de jury, mer ze wore ‘t d’r toch unaniem euver èns det Isa Meuwisse oet Ech mit ‘t door zien mam gesjreve gedich Formule Max, det ging euver de toesjtenj toes es Max Versjtappe aan ‘t race is, Limburgs Kampioen mós waere. Juryveurzitter Dwayne Horbach móch de volgende kinjer ‘ne sjone Veldeketrofee gaeve:

groep 3 en 4:

  1. Anouk Raijer, krink Vènlo/Tegele
  2. Audrey Strüver, Kèrkraoj
  3. Thomas Camp, krink Weert

groep 5 en 6:

  1. Thijmen Höppner, krink Weert
  2. Ninthe Noteborn, Kèrkraoj
  3. Evi Pustjens, krink Ech/Zöstere

groep 7 en 8:

  1. Isa Meuwissen en Limburgs kampioen 2017, krink Ech/Zöstere
  2. Lisa Idink, krink Vènlo/Tegele
  3. Tessa Stultiëns, krink Weert

En allemaol ginge ze mit ‘n oorkonde, ‘n Veldeke-pet en ‘n beachballset mit Veldekelogo op hoes aan. Kemissieveurzitter Henk Buskes haopde det ze volgend jaor ouch weer d’rbiej zólle zin.

Klik veur ‘n fotoreportage van Hans Simons en Lia Jans, mit foto’s van alle finaliste.

Terug naar het overzicht