Finale Groet Limburgs Dictee: väöl foute en väöl plezeer
Op dinsdag 12 juni voont in Sittard de Finale plaots vaan ’t Groet Limburgs Dictee 2018. De finaliste (in twie cattegorieje: lezers vaan de Limburger en bekinde Limburgers) móste 17 zinne op pepier kriege die verdeild waore euver 7 versjèllende Limburgse dialekte. En eder vaan die dialekte heet weer zien eige eigenaordeghede es ’t op oetspraok en spelling aonkump. Gei woonder tot ’t aontal foute nogal aon d’n hoege kant waor: bij de lezers laog dat gemiddeld op 95 foute en bij de bekinde Limburgers zelfs op 116. Meh dat doog neet aof aon ’t plezeer wat zoewel de deilnummers es de publieke tribuun de gansen aovend höbbe gehad. D’n hoofredacteur vaan De Limburger waor nao aofloup in eder geval hiel beslis: volgend jaor obbenuits.
Samewèrking tösse De Limburger en Veldeke
’t Groet Limburgs Dictee is georganiseerd door de gezèt De Limburger en dialekvereineging Veldeke. De Limburger zörgde veur ’n perfekte organisatie en Veldeke veur d’n inhaajd vaan ’t dictee. In ’t hoofkentoer in vaan de Media Gróp Limburg Sittard woorte alle deilnummers en gaste gasvrij oontvaange mèt hepkes en drenkskes. In de groete hal vaan ’t gebouw stoonte mie es 50 täöfelkes opgestèld veur alle deilnummers. Op ’t podium zaote 7 veurlezers vaan Veldeke die eder ’n aontal zinne vaan ’t dictee in hun eige dialek veurlaoze. Die dialekte waore vaan Noord nao Zuid: Venrods, Venloos, Wieërts, Remunjs, Zittesj, Mestreechs en Kirchräödsj. D’n teks góng euver de Limburgse identiteit en ’t belaank vaan de Limburgse taol daobij.
Veurrundes mèt väöl inzenders
In de veurrundes hadde ziech 30 lezers vaan De Limburger ’t rech op deilnaome aon die Finale bevochte door e stökske teks te vertaole in hun eige dialek. Deen teks waor versjeie kiere te leze gewees in de gezèt en dat lieverde ’n oonverwach groet aontal inzenders op: 247 lezers höbbe ziech oetgeleef in mer leefs 92 versjèllende dialekte (este alle dörpe die geneump woorte ’n eige dialek maags touwdiechte). En de inzendinge kaome vaanoet de ganse provincie, vaan ’t uterste Noorde tot ’t deepste Zuide. De jury vaan Veldeke had dus ’n flinke taak um dao de 30 bèste oet te zeuke, boebij zoewel de creativiteit en inventiviteit vaan de vertaoling es de correcte spelling vaan ’t dialek in de aofweging mèttèlde. Daoneve nuujde De Limburger nog ’n twintegtal bekinde Limburgers oet um deil te numme, boebij de wereld vaan meziek en entertainment good vertegenwoordeg waor.
Veldeke spelling 2003 es leidraod
De deilnummers wiste tot de Veldeke Spelling vaan 2003 bij ’t beoordeile vaan de dictees es leidraod zouw gelle. Meh die spellingsregels zien nogal oetgebreid en dèks ingewikkeld. Daorum naom in de poos de veurmaolege streektaolfunctionaris Pierre Bakkes ’t woord um de deilnummers doa-in get weegwies te make. Mèt ’t book vaan de Veldeke Spelling 2003 in de hand leide heer ederein door de gansen dictee en langs alle valkoule en instinkers die daobij veurkaome. Mennegen deilnummer zaogste mèt de han veur hun ouge zitte wie ze te hure kraoge wat ze allemaol fout hadde gespeld. Meh veuraof waor ouch al gezag: mèt doen is bekans eve leuk es winne.
De winners
In de categorie bekinde Limburgers waore de ierste drei plaotse es volg verdeild:
· Op de derde plaots mèt 94 foute: Jo Huinen vaan Spik en Span
· Op de twiede plaots mèt 77 foute Sjra Puts, zenger en prizzentator
· Op de ierste plaots mèt 74 foute: Niek Dirkx vaan Spik en Span
In de categorie lezers vaan De Limburger waore de ierste drei plaotse es volg verdeild:
· Op de derde plaots mèt 70 foute: Riky Simons oet Zjwame
· Op de twiede plaots mèt 68 foute: Toos Schoenmakers oet Vlorp
· Op de ierste plaots mèt 55 foute: Henk Hover oet Ech
Henk Hover, prizzentator en radiomaker, had netuurlek ouch in de categorie bekinde Limburgers gepas, meh heer heet ziech de meujte genome um gewoen nao ’t plaots in de finale te dinge door ’n vertaoling in te lievere bij de gezèt. Dat lieverde häöm neve ’n bos blomme en iewege glorie ouch ‘nen dinerbon op, dee häöm woort oetgereik door de veurzitter vaan Veldeke, Christine van Basten.
Wie gezag: ’t groet aontal spellingsfoute doog neet aof aon ’t plezeer vaan d’n aovend. En ‘t gezamelek initiatief vaan De Limburger en Veldeke Limburg heet de Limburgse taol weer ins volop in de sjienwerpers geplaots. En dat is ’n plaots die ze verdeent.
Foto’s: Pieter Ebus