Finale Limburgse Taolquiz: enthousiaste reacties

De finale vaan de Limburgse Taolquiz dee De Limburger en Veldeke Limburg georganiseerd hadde, lieverde ‘ne zaol vol enthousiasme op. De gekoze vörm vaan ‘ne quiz bleek beter aon te sloon es ’t diktee vaan verleie jaor. De 50 finaliste kraoge noe 50 miekäösvraoge op e groet sjerm geprizzenteerd en kóste mèt ‘nen app op hun smartphone of tablet de antwoorde intoetse. Ze woorte daobij in de rögk gesteund door ’n vol publieke tribuun die vaanaof ’t balkon kós mètkieke en zelf ouch nog veur spek en boene de vraoge kós invölle. Prizzentators Ronald Colée en Hanneke Drohm leide ederein op ’n plezerege en oontspanne meneer door d’n aovend. Veurmaoleg streektaolfunctionaris Pierre Bakkes fungeerde es getuige deskundege, dee teks en oetlag gaof bij meujeleke vraoge.

Karel Ruiten oet Remund es winner

40 finaliste hadde ziech via de online veurrunde gekwalificeerd en daoneve doge ouch nog 10 prominente Limburgers hun bès um de 50 vraoge zoe good meugelek te beantwoorde. Dat waor nog neet zoe gemekelek want Veldeke waor devaan oetgegaange totste vaan finaliste wel get maags verwachte op ’t gebeed vaan de Limburgse taol. ’t Gemiddelde aontal gooj antwoorde waor 31 vaan de 50. Des te opmèrkelek tot de winner Karel Ruiten dao mèt kop en sjouwers bovenoet staok mèt mer leefs 43 gooj antwoorde. Heer verklaorde ziene wins door te wieze op ’t feit tot heer door de ganse provincie actief is gewees en daodoor vaan alle dialekte wel get heet opgestoke.

Henk Hover wint bij de prominente

Bij de prominente góng Henk Hover, radiomaker bij L1, mèt de wins devaan door. Ouch dat waor opmèrkelek want heer had verleie jaor ouch al ’t Limburgs diktee gewonne. Dat kint dus gein touwval mie zien. En ouch Henk huurt in zien program Plat-eweg netuurlek tal vaan Limburgse dialekte aon ziech veurbij goon. Henk leet 9 ander prominente Limburgers achter ziech en dao waore neet de minste bij, zoewie: député Ger Koopmans, Karel Fiddelers veurzitter vaan de LVKA, zangeres Dyanne Sleijpen, muzikant Ivo Rosbeek, Niek Dirkx vaan Spik en Span en op ’t lèste momint nog touwgevoog: NRC journalis Joep Dohmen.

Meujeleke en minder meujeleke vraoge

Dao waore mer e paar vraoge bij die 50 die ederein good had. Wat ‘e räöfke’ waor wis ederein en ouch tot ’n sjötting die op ‘t ‘gesjeid’  steit de erfgrens volg. De mieste meujte hadde de deilnummers mèt ’n vraog euver professor Pieter Willems, dee in de negetiende ieuw bekind woort door zien dialekenquête; meh dat is ouch wel hiel lang geleie. Bij ein vraog verraojde prizzentator Ronald Colée ’t antwoord al door te zègke “En noe goon veer nao Sittard” oonderwijl de vraog “Boe bestèlt me veier beier?” nog mós koume. Meh zelfs dat antwoord had neet ederein good umtot Ger Koopmans evekes ziene brèl had aofgezat en per oongelök op de verkierde knóp had geduid. Wat heer ruterlek touwgaof.

Volgend jaor obbenuits

Veurzitter vaan Veldeke Limburg Christine van Basten en Rob van Lee, manager communicatie vaan Dee Limburger deilde de prijze oet, ’n ballonvaart bove Limburg veur winner Karel Ruiten en iewege roem veur de winner bij de prominente, Henk Hover. Alle deilnummers kraoge daoneve nog ’n tuut mèt streekprodukte en versjèllende dialekbeuk mèt nao hoes. Nao aofloup waor ederein allein mer enthousias euver de meneer boe-op de Limburgse taol weer ins oonder de aondach is gebrach. De vörm vaan ‘nen taolquiz bliek daoveur ’n oetstekend instrumint, wat naovolging verdeent. Volgend jaor obbenuits.

← Ga terug