Finale Veldeke Declamatiewedstried 2019: Waat is det sjpannend…

“Waat is det sjpannend óm hiej in de spotlights te sjtaon en waat good det geur det allemaol dörft veur zónne vólle zaal”, zo begroet Veldeke-veurzitter Christine van Basten-Boddin de kinjer die deze zaoterdigmiddig, op 25 mei 2919, mit gaon doon aan de finale van de declamatiewedsjtried in DOK6 in Panninge. Natuurlik waere de papa’s, mama’s, opa’s, oma’s, anger fans en es sjpesjaal gaste de lede vanne Raod van Toezich van ’t Hoes veur de Kunste Limburg ouch hertelik welkom geheite.

Veur Christine is ’t de eerste keer det ‘t ’n declamatiefinale mitmaak; det is ’t neet veur prizzentator Hans Jacobs, dae op zien veurtreffelike meneer de kinjer in gruupkes van vief nao veure reup, ’n kort präötje mit häör maak, ’n applaus vreug, de kinjer ’n kómplement guf es ze vaerdig zin en ze aanreujt efkes vruntjelik te lache nao de jury.

De Jury

Die jury besjteit oet: Hortense Brounts, Katja Henz, Anke Peters, Herm Pollux en sjtreektaalfunctionaris Ton van de Wijngaard. De dames en here höbbe d’r ‘ne danige klus aan óm oet 30 kanjers de allerbèste te keze.  Winneers zin ’t eigelik allemaol: dees kinjer höbbe de veurrunj in häöre eige krink of bibliotheek gewónne. En det haet ’t moessjtil loesterend publiek, det ‘ne heleboel versjillende dialekte krieg te heure, ouch door. “Door de meneer wo-op de kinjer häör gedich bringe, begrieps se ’t gans”, zaet jurylid Herm. En Katja neudig häör oet óm allemaol nao ’t zuide te verhoeze, zodet ’t ze eersdaags in zien brögkklas krieg. Ton vintj det de kwaliteit mit ’t jaor nao baove geit en Anke kèn zich es aad-winnares weer helemaol inlaeve.

De Winneers

Waat ’n verrassende veurdrachte zitte d’rtösse. De toekomstige Jocusprins kump veurbiej, veur heure wie se gemekkelik € 50,- kèns verdene, wie ’t klink es se rammels vanne hónger, wie groot se dich kèns veule es nemes kiek, det ’n windje toch ‘puur natuur’ is, of wie se dich veuls es nemes plat taege dich kalt.

Ónger ’t juryberaod zingk Jelke Schijlen oet Mesjtreech veer liedjes wo-ónger ’t songfestivalliedje ‘Arcade’ van Duncan.

Aansjloetend maak juryveurzitter Hortense de oetsjlaag bekènd. “Alle kinjer höbbe ’t supergood gedaon, mer sommige haje net nag get extra’s, wodoor ze ’n paar puntje meer höbbe gekrege.”

Groep 3/4:
1.       Freek Swiatalski oet Zöstere mit ‘Is mich det sjrikke’
2.       Emmeline Verweij oet Tegele mit ‘Wat ich later waere wil’
3.       Yentl Moonen oet Ni-jwieërt mit ‘As nemes kiêktj’

Groep 5/6
1.       Mirte Pustjens oet Roastere mit ‘Eine wendj’
2.       Jip Haagen oet Kirchroa mit ‘Went jinne kiekt’
3.       Julia Silkens oet Remunj mit ‘Rammele van de hónger’

Groep 7/8
1.       Bente Selder oet Heële mit ‘D’r hobby’
2.       Evena Kraanen oet Zöstere mit ‘Nemes kalt plat taege mich’
3.       Thijmen Höppner oet Ni-jwieërt mit ‘Rommel’.

Veur dees nege kinjer is d’r ‘ne sjone Veldeke-trofee. En alle deilnummers gaon nao hoes mit ’n oorkonde en ‘ne bidon mit Veldekelogo. Volgend jaor zeen veur ze gaer truuk.

De foto’s zin van Hans Simons en Lia Jans-Linssen. Veur ein collage van alle winnaars, klik hiej.

 

← Ga terug