Frans Budé wint Sjiek Literatuurpries

Nuie Limburgse literaire pries veur ’t iers oetgereik
Gistere, op zoondag 21 jannewarie 2018 woort op ’t Festival Sjiek in de ECI Cultuurfebrik in Remund veur d’n ierste kier de Sjiek Literatuurpries oetgereik. Dee góng nao de sjrijver Frans Budé (Mestreech 1945) veur ziene roman “De dagen”. Dit verhaol euver d’n oonsjöld vaan e keend en eveneins de vermomde autobiografie vaan ‘ne gevestegde sjrijver, versjeen in 2017 bij Oetgeverij Karaat. De jury, bestaonde oet redacteur/auteur Daan Doesborgh, L1-cultuurredacteur Jolien Linssen en aajd streektaolfunctionaris Pierre Bakkes, prijsde de roman vaan Budé es subtiel en virtuoos.

“De dagen” späölt ziech aof in de jaore ’50 vaan de 20e iew. Alderlei klein en groete gebäörtenisse koume veurbij: vaan ’t eerbiedeg knele op straot veur ‘ne preester dee iemes de lèste sakkerminte geit touwdene tot ’t verpliech verandere vaan lieger sjaol. Puur nostalgie? Veural: puur genete vaan de diechterleke wijs boe-op de besjrijvinge weure gegeve, volgens de jury.

Zés nominaties
De Sjiek Literatuurpries is bedoeld veur de bèste roman vaan ‘ne Nederlandse auteur boe-in Limburg op einegerlei wijs weurt geprizzenteerd. Veur de longlist woorte 18 recentelek versjene beuk ingesjik. Daovaan bleven ‘rs op de shortlist zès euver: Grond vaan Wil Boesten, De dagen vaan Frans Budé, De sjamaan van Sevilla vaan Govert Derix, De Opname vaan Willem Kurstjens, De verdwenen stad vaan Ton van Reen en Voorland vaan Octavie Wolters. Al dees auteurs droge veur op ’t Festival Sjiek.

D’n door Frans Budé gewonne Sjiek Literatuurpries besteit oet e geldbedraag vaan € 2.500,-. Daovaan is € 1.000,- gerizzerveerd veur e paar optrejjes vaan Budé op Limburgse middelbaar sjaole. Dit um de plaots vaan de Limburgse .literatuur in de klasse te vergroete.

Taol- en Lèttereplatform Limburg
De Sjiek Literatuurpries en ’t twietaoleg Festival Sjiek (mèt meziek, literatuur en fèlm in zoewel ‘t Nederlands es ’t Limburgs) woorte georganiseerd door ’t Taol- en Lèttereplatform Limburg (TaLep).  TaLep heet devoor gekkozen te starte mèt ‘ne pries veur Nederlandstaoleg literair werk; ’t plan is um in 2019 Limburgstaoleg literair werk veur de pries in aonmèrking te laote koume.

TaLep weurt gevörmp door de Commissie Literatuurgeschiedenis LGOG, Cubiss Limburg, Hoes veur de Kunste Limburg, Lètterkundeg Centrum Limburg, Stiechting LiLiLi, Raod veur ’t Limburgs, Universiteit Mestreech, Veldeke Limburg en de Vereineging veur Limburgse Dialect- en Naomkunde. ’t Festival en de literatuurpries weure financieel meugelek gemaak door de Provincie Limburg en de gemeinte Remund.

(Mestreechs)

← Ga terug