Ger Koopmans same mèt Geert Gabriëls redacteur vaan Platbook 21

In tegestèlling tot ieder edities vaan Platbook umvat de redactie vaan Platbook 21 dit kier twie persoene. Député veur Cultuur vaan de provincie Limburg, Ger Koopmans, zörg same mèt de wèthawwer vaan Cultuur vaan Weert, Geert Gabriëls veur de käös, ’t veurwoord en de prizzentatie vaan Platbook 21, wat es thema “Gans Greun” heet gekrege.

Ger Koopmans is al veer jaor verantwoordelek veur ’t streektaolbeleid in Limburg. Heer heet mèt deveur gezörg tot ’t Limburgs es officieel regionaol taol in Nederland erkind zal weure. ’t Laog dus veur de hand um häöm veur de redactie vaan Platbook te vraoge. ’t Verband tösse ’t thema en de kleur vaan zien partij zal dudelek zien.

Meh ouch Geert Gabriëls is drök bezeg mèt de streektaol. Heer is in de gemeinte Weert verantwoordelek veur oondermie cultuur en dao vèlt netuurlek ouch ’t Weerts oonder. Ouch heet heer sinds kort zitting in de Raod veur ’t Limburgs. Aongezeen heer lid is vaan Greun Links is de link mèt ’t gekoze thema ouch vasgestèld.

Same zalle zie ’n käös make oet de väöl inzendinge die Platbook ederskier weer krijg. Zoe’n 40 inzendinge koume in de nui Limburgstaolege blomlezing te stoon. Geer kint nog mètdoen. Sjik eur Limburgstaoleg verhaol of gediech vaan maximaol 600 wäörd in veur 15 aprèl aonstaonde nao paul@uitgeverijtic.nl en wee wèt zeet geer bij de prizzentatie debij en oontvingk geer oet hun han e gratis exemplaar vaan ‘t nui book.

Euver Platbook

Platbook is ’n serie dialekbeukskes veur Limburgstaolege sjrijvers en lezers. Auteurs oet de ganse provincie wèrke mèt um ederskier weer ’n opvallend thema te besjrieve. Veur eder editie maak ’nen andere, bij ’t thema passenden redacteur, ’n selectie oet de tekste en sjrijf ’t veurwoord. Platbook weurt oetgegeve in opdrach vaan ’t Hoes veur de Kunste Limburg en kump tot stand in samewèrking mèt Veldeke Limburg, de Raod veur ’t Limburgs, de Stiechting LiLiLi, Oetgeverij TIC en Wim Kuipers (de bedinker vaan ’t Platbook-konsep). Platbook is veur € 9,90 te koup in de webshop vaan oetgeverij TIC.

Wèlt geer mie wete euver Platbook of de redacteure, bel daan mèt Oetgeverij TIC: 043-3262414 of kiek op www.uitgeverijtic.nl

 

 

← Ga terug