Gouverneur Jos Lantmeeters besjermhier streektaol in Belsj Limburg

In naovolging vaan ziene Nederlands-Limburgsen ambgenoot Theo Bovens is noe ouch de gouverneur vaan Belsj Limburg, Jos Lantmeeters, beneump tot besjermhier vaan de Limburgse taol in zien provincie. Dat gebäörde op oetnudeging vaan eus zustervereineging Veldeke Bels(j) Limburg, die ziech opmaak um häör 20-jaoreg zjubelei te viere.

Es de coronaciefers ’t touwlaote zalle in de loup vaan dit jaor versjèllende festiviteite plaotsvinde. In d’n aonloup is 21 fibberwarie, d’n Internationaolen Daag vaan de Moojertaol, aongegrepe um ‘nen ierste kiere nao boete te trejje mèrt e gedinkwierdeg gebäörtenis: gouverneur Jos Lantmeeters weurt in d’n adelstand verheve es Besjermhier vaan de Limburgse streektaol. Heer kraog ’t Genker dialek mèt de paplepel ingegeve, heet ‘ne werme band mèt zien ierste taol en kint die mèt groete hendegheid hantere.

De gouverneur stap daomèt in de vootspore vaan zienen ambgenoot aon d’n andere kant vaan de Maos, Theo Bovens. Dee verkreeg ziene ieretitel in 2016 in ’t kader vaan ‘t 90-jaoreg bestoon van Veldeke Limburg. Dat waor veur d’n oetbraok vaan de coronacrisis mèt e groet evenemint. Dat moot noe eve weure oetgestèld meh Veldeke Bels(j) Limburg is vas vaan plan um binnekort deze nuie stap in de carrière vaan hunne gouverneur mèt de nudege ceremoniële glans op te luustere.

Veldeke Bels(j) Limburg wèlt de cultuurexpressie in de brei versjeienheid aon Limburgse dialekte stimulere, zoewel sjriftelek es op de buun. Daoneve is ’t de bedoeling um de lokaol taolvariante in ’t landsjap ziechbaar te make via moersjèlderinge, veerze op stóptegels, oethaangsjèlder, twietaolege straotnaomsjèlder ezw. Zoe krijg de couleur locale ouch ’n toeristische weerde. Meh netuurlek is ’t actief gebruuk vaan de Limburgse dialekte in zoe väöl meugelek sociaol kontekste cruciaol. Zoe kint de streektaol ziechzelf verrieke en aonpasse aon de maotsjappeleke evolutie.

Al heet Bels(j Limburg nog ‘ne flinken achterstand in te hole in vergelieking mèt de naobers in Nederland, toch zien zie de maotsjappeleke staotus vaan de streektao stijge. Jao, stèllekes aon weurt dialek spreke ouch in Belsj ’n teike vaan cultureel oontwikkeling.

Veldeke Bels(j) Limburgs smeit ‘ne band tösse 7 lokaol en regionaol aofdeilinge: Veldeke Genk, Veldeke Hasselt, Veldeke As, Veldeke Maasland, Veldeke Dommelland, Veldeke Lonerland en Veldeke Truierland. Daoneve betrèk ze nog andere dialekkring bij häör wèrk. Veldeke Bels(j) Limburg gief e kwartaoltiedsjrif oet en jaorleks versjijnt ‘ne sjäörkelender met dialekspreuke, de Limburg Almenak.

 

← Ga terug