Gratis Cultuurfestival Sjiek op zoondag 21 jannewarie in Remund

Tal vaan bekinde Limburgse artieste trejje koumende zoondag op in Remund en d’n entree is gratis! Festival Sjiek vint plaots in de ECI Cultuurfebrik in Remund en begint um 11.00 oor mèt workshops vaan o.a. Marnix Mulder (toneelconsulent) en Stevie Ann (leedsjes sjrieve). Vaanaof 13.00 begint ’t program in vijf versjèllende zaole. In de popzaol späölt oondermie de band Sneckers oet Eygelshove en Kwante Hippe oet Venlo. Ouch de funkrockband Moeders Mooiste is te beluustere en ‘t Frans Pollux Trio slut aof mèt Limburgstaolege leedsjes.

Oondertösse späölt in d’n Theaterzaol d’n amateurtoneelgróp Facet e stök euver zeve vrouwe aon hun stamtaofel. Daonao trejt Stephanie Struijk op met Nederlandstaolege leedsjes en in deze zaol weurt ’t program aofgeslote mèt de väöl gereumpde veurstèlling Ich bau dir ein Schloss vaan Mieneke Bakker euver de gevolge vaan de mijnsleting in ’t Ooste vaan Limburg. In de groete fèlmzaol drejt vaanoaf 12.00 oor d’n absurdistische fèlm Limburgia vaan Noël Loozen oet Mestreech euver de Limburgse sjötterswereld. En esof dat nog neet genög is weure in de kleine fèlmzaol lezinge en veurdrachte gehawwe door oondermie Ton van Reen, Colla Bemelmans, Ger Bertholet en Frans Budé. En daan is d’r ouch nog ruimte veur joonk talent op ’t ope poppodium oonder leiing vaan hardrockdrummer Niena Bocken.

Aon ’t eind vaan d’n daag weurt ouch nog veur d’n ierste kiere de nuie Limburgse Literatuurpries oetgereik aon eine vaan de zes genomindeerde auteurs.

D’n entree is wie gezag gans veur niks. Geer hoof uuch ouch neet aon te melle meh kint gewoen binneloupe. Allein veur de workshops weurt e maximaol aontal deilnummers aongehawwe. Zoondag 21 jannewarie vaan 11.00 tot 17.00 oor in de ECI Cultuurfebrik in Remund. Alle informatie op de website vaan Festival Sjiek.

(Mestreechs)

← Ga terug