Groet Mestreechs Dictee groet succes

Op zoondag 8 aprèl heet Veldeke Krink Mestreech alweer veur de vieftiende kier ’t Groet Mestreechs Dictee georganiseerd. En ’t waor weer e groet succes!. Bekans 100 deilnummers waore oondaanks ’t sjoen weer en oondanks Paries-Roubaix op d’n tèllevisie nao ’t Centre Céramique gekoume um ziech te buige euver 20 zinne oonvervalsde Mestreecter taol.

Al had de organisatie aongekóndeg tot ’t dictee get gemekeleker zouw zien es verleie jaor, wie Theo Bovens es sjrijver de deilnummers neet had gespaord. Toch laog ’t gemiddeld aontal foute nog op 42. Meh dao waore ouch e flink deil deilnummers wat minder es 10 foute leet notere. De winner waor Huguette van Dooren Lahaije mèt 6 foute, veur Patricia Paulissen en Eddy Zeelen mèt eder 7 foute.

De Börgemeisterse es sjrijver?

’t Dictee waor deze kier gesjreve door de börgemeisterse Annemarie Penn-te Strake. Altans dat wouw de organisatie us wiesmake. Meh de börgemeisterse maakde medein komaof aon dat verhaol door te vertèlle tot d’n teks dee zie had ingedeend waor aofgekäörd en tot ze Will Wintjens toen mer es geissjrijver had ingesjakeld. En al had ze ’t neet zelf gesjreve ze moos ’t wèl ‘ne kier veurleze, boevaan ze zelf ’t idee had tot dat veural gedoon waor um ’t de deilnummers extra lesteg te make. Veur de zekerheid waor veur ’t eigeleke dictee ‘ne veurlezer ingeheurd dee ’t in good Mestreechs euver doog.

Ete es thema

’t Thema vaan dit jaor waor ‘Ete’ en veur ’t gemaak woort ouch drinke daobij gerekend. En dao vele nog hiel get meujeleke wäörd mèt te verzinne, zowie avvekäötsje en cógnekske. Meh ouch de zin mèt de douf die douf waor (twie kier ’t zelfde gesjreve meh gans aanders oetgesproke), bezörgde mennegein kopzörg. En es dessert kraoge de dielnummers nog ’n deil ‘bonuswäörd’ op hunnen teleur, zoewie madzjel (dikke vrouw) en mazjerang (kleingeld) en knótskneeje.

Veur spek en boene?

E kwaart vaan alle deilnummers doog veur spek en boene mèt. Ein vaan hun had veuraof aongekondeg tot ze gein boene lösde en daorum veur kortelèt deilnaom. Meh dreikwaart waor zoe courageus um wat ze hadde opgesjreve aon de jury veur te lègke. Mèt e gemiddeld aontal foute vaan 42 es rizzeltaot. Sommege deilnummers hadde beter medein mèt ’n roej pen kinne sjrieve, zag d’n daagveurzitter. Meh ’t is wie bij de Olympische speule: deilnumme is belaankrieker (en eve sjiek) es winne.