Veldgewas: Hans Op de Coul (1948-2023)

Mèt Keersemes góng in alle stèlte radiomaan Hans op de Coul van us eweg. Heer waor ‘ne gebore Twent (nou jeh, zien awwers kaome oet Tilburg en Venlo), meh heet mie veur Oos Taal beteikend es ‘n ganse hampel deskundege bijein.

Zoe waor heer de bedinker vaan de Boetegeweun Boetezitting, de officieel opening vaan de Vastelaovend, op zaoterdagmörge in Venlo. Dat waor en is provinciaollang ammezasie. Op de Coul waor evels mie vaan ‘t kleinere, zoewie zie Medammecour, cabberèt in dialek – dialek, voont heer, wat e bitsje eweg mós vaan de sfeer vaan lösteg plezeer en dörpse lol.

Daorum experimenteerde heer bij de Limburgse umroop mèt nuits(beriechte) in ‘t Limburgs, in ‘n speciaol rubriek die heer Euvernuuts neumde. Gei geweldeg succes. Verklaoring: ‘t sjrieve vaan de miestal zakeleke beriechte in volblood Limburgs kosde väöl werk – te väöl voont me. Jaomer.

Eve later kaom väöl beter nuits. Zien wekelekse cultuurprogram De Onderstroom woort verriek mèt de rubrieke ‘t ‘Verdreet vaan Limburg’ vaan Ger Bertholet. Eder week ‘t wel en wee oet de dörpe Zjweitberg, boe ‘t leve hel waor, en Inninghaove. Columns vaan topkwaliteit, ‘t begin vaan wat de renaissance vaan de literatuur in ‘t Limburgs geneump is.

Op de Coul waor toen al bezeg mèt ‘n serie euver poëzie in Limburg, same mèt Ine Sijben en Ben van Melick, die rizzelteerde in ‘t book (leefs 400 pagina’s): ‘Maar er is meer… Poëzie van Limburg in de twintigste eeuw’. ‘n Touwlichting daobij: “De dialectpoëzie treft u aan in het hart van het boek en dat is geen toeval.”

Heer waor wijer de bezielde leier en eindredacteur vaan ‘t zjubeleibook ‘Voorlopig zijn we onder ons… Over dialect, identiteit en de Limburgse publieke omroep (1945-2005)’, wat dus versjeen bij ‘t 60-jaoreg bestoon vaan d’n awste regionaolen umroop in Nederland. Hans op de Coul verleet zienen umroop in 2008. Heer woort 75 jaor.