Herzene versie van ‘Mien eerste/ieëste wäördjes’

Nao twee suuksesvolle prizzentasies in Ech en Remunj is ’t veurlaeswaordebeukske oet 2016 weer volop te kriege veur alle luuj die häör peuters en kleuters gaer veur wille laeze in ’t plat.

In dit beukske sjtaon op 60 blajer 180 korte, veerregelige, lekkerloupende versjes bie aeveväöl toepasselike en aansjpraekende teikeninge. Ze zin in ’t Echs resp. Zjwaams/Remunjs gesjreve, mer good laesbaar in de wiej ómgaeving. ’t Beukske is ’n samewèrkingsprojek van de Milieu-en Heemkundevereiniging Zjwame (de oetgaever van de eerste drök) en de Veldekekringe Remunj en Ech.

Door ruumhertige subsidies van Veldeke Limburg, de Raod veur ’t Limburgs, de Provincie en de gemeinte Ech/Zöstere kèn dees oetgave verkoch waere veur de sjappelike pries van € 12,50.

De oetgaevers haope den ouch det dit beukske ziene waeg moog vinje nao eljers, opa’s, oma’s, omes, tantes, peutersjpeelzale en kleutersjole, zodet ós plat doorgegaeve kèn waere aan de volgende generatie. Mer ouch get grótter kinjer lere zo gemekkelik plat laeze, veural es de versjes eerder al aan häör zin veurgelaeze.

De beukskes zin te kriege in de plaatselike bookhanjels in Remunj, Zjwame en Ech. Toesjture kan ouch, mer den kómme d’r verzendkoste bie.
Nota bene: Tijdens lockdown mót alles opgesjtuurd of aafgehaold waere ómdet de bookhanjels toe zin. Dat ken via telefoon of e-mail o.a. via Boekhuis De kleine Tovenaar in Maasniel, telefoon: 0475 32 93 92  |  06 155 00 525 of per e-mail: info@dekleinetovenaar.nl. Via beukske@zjwame.nl kèn det ouch geregeld waere.