HET BAD / ’t BAD – Twieëtalige Venlose roman met indringend tiedsbeeld jaore dertig

Pas geleje is de roman ’t Bad / Het Bad van Willem Kurstjens oetgebrach. Aan de hand van de belaevenisse van twieë arbeidersgezinne rónd en in ‘t Venlose aopelóchzwumbad De Onderste Molen schets hae ‘n indringend beeld van de jaore dertig van de vurrige ieëw.

De roman begint mit twieë schilders die aan de veuraovend van de äöpening, op 1 juli 1934, de schötting piensele die ‘t bad in twieë deilt: in ‘n vrouwluuj en ‘n mansluuj deil. Eur vrouwe kómme eur ‘t aete bringe.

Zoeë liere weej stökske beej bietje twieë gewoeëne Venlose femilies kinne, die de crisis van de jaore dertig zulle mótte doorstaon. ‘t Aldste maedje van de ein femilie wuurt verleef op ‘ne knöl oet de andere femilie, aevel tösse druim en daod steit de schötting die d’n behierder van ‘t bad op oetdrökkelik verzeuk van kattelieke geistelikke en de pólletiek haet opgerich.

’t Bad / Het Bad verschient in ‘n ‘twieëtalige’ oetgaaf, Venloos-Nederlands. Aan de vertaling in ‘t Venloos hebbe Pieter Ebus en Frans van de Rijdt van Veldeke Venlo mitgewerk. ‘t Book wuurt gepubliceerd door oetgaeverie Shinz en kos € 9,95.

De portretfoto beej dit berich is van fotograaf Lé Giesen

← Ga terug