Hortense Brounts nump aofsjeid es veurzitter vaan Veldeke Krink Mestreech

Nao 20 jaor bestuurslidmaotsjap boevaan 10 jaor es veurzitter nump Hortense Brounts aofsjeid vaan Veldeke Krink Mestreech. Dat wèlt zègke tot ze oet ‘t bestuur stap un nao eige zègke de nuie veurzitter neet veur de veuj te loupe. Hortense blijf wel betrokke bij Veldeke Mestreech, oonder mie door häör werk veur de kindercommissie.

‘t Zittend bestuur heet häör in verband mèt corona ‘n aongepas aofsjeid mote bereie. Alle touwspraoke en lofredes waore op video opgenome. Zoe waor dao e beriech vaan häör veurgengster Els Ottenheijm, vaan de börgemeisterse vaan Mestreech Annemarie Penn, vaan de besjermhier van Veldeke, gouverneur Theo Bovens en zelfs ‘n videokemissie vaan André Rieu, dee Hortense heet liere kinne bij de veurbereiinge vaan ‘t Groet Mestreechs Dictee.

Hortense zelf spraok ‘n aofsjeidswoord veur de lede vaan de Veldeke Krink Mestreech in op video. Geer kint häöre speech hei beluustere en bekieke. En es aofsleting waor dao nog ‘n mètdeiling vaan de veurzitter vaan ‘t provinciaol bestuur vaan Veldeke Limburg, Christine van Basten, die Hortense bedaankde  veur al ‘t werk wat zie veur de Krink Mestreech en veur Veldeke Limburg in de aofgeloupe jaore verriech heet. Es bliek vaan waardering veur al dat werk verliende Christine van Basten aon de Hortense de beneuming tot ierelid vaan de vereineging. Geer kint de touwspraok vaan Christine van Basten hei beluustere.

Es nuie veurzitter vaan Veldeke Krink Mestreech zal Carlo Schrienemekers aontrejje. Heer waor al lid vaan ‘t bestuur vaan de krink. Bekiek hei zienen introductievideo.

← Ga terug