Ierelidmaotsjap Veldeke veur Ludo André

D’n hier Ludo André is beneump tot ierelid vaan dialekvereineging Veldeke. Heer heet ziech tientalle jaore laank ingezat veur de Veldeke Krink Mestreech, iers es bestuurslid, de lèsten tied oondermie es “keldermeister” wat wèlt zègke tot heer verantwoordelek waor veur d’n opslaag en verspreiing vaan beuk en ander publicaties die Veldeke in beheer had. Es örgens get bezórg mós weure daan kós me Ludo ummertouw belle en daan koum dat in orde. Meh mèt ’t oug op ziene leeftied (82) en de wins vaan zien vrouw, die ouch wel ins op de ierste plaots wouw koume, heet heer kort geleie beslote ouch die functie neer te lègke. Tijdens ’n aofsjeidsdinerke bij Harry’s in Mestreech woort häöm tot zien eige verrassing ’n oerkonde euverhandeg en e spengske op z’n revèrs gespangk die hure bij ’t ierelidmaotsjap vaan Veldeke. Heer waor in zien eige wäörd “gans verpópzak”

← Ga terug