In Zjwame wille heel get luuj baeter Zjwaams kènne laeze en sjrieve

De Dörpsraod Zjwame haet Riky Simons-Julicher, mitwèrkster aan ’t Zjwaams Waordebook, gevraog óm zónne kurzes te verzorge in de Laeskamer. De eerste flitskurzes Zjwaams laeze en sjrieve op twee aovindje door Riky moog waal ’n suukses genump waere. Mer leefs 14 Zjwamenere deje nao de oproop in desember in jannewarie mit.

Ze oefende ó.a. mit de zès neudige ekstra klinkers. Ze loze same ’n blaad oet ’t waordebook en ’n verhaol euver de Zjwamer brögkeheilige Nepomuk. D’r kwome sjoon Zjwaamse wäörd ter sjpraoke en ouch drie digitaal meugelikhede óm wäörd op te zeuke, biejveurbeeld in ’t Zjwaams Waordebook. Wiejer ’n blaad mit väölgemaakde foute en ’n ech diktee.

Riky haaj ouch inkele eige gedichte oetgeprint veur de deilnummers óm dao get oefeninge mit te doon en d’r woor veur ederein de offisjeel Sjpellinggids van de Raod veur ’t Limburgs 2003, ‘t ‘Steuntje’ mit klankveurbeelde en de map met Limburgse dialecte. “Leuke kurzes en ich dink det ich in ’t vervolg väöl minder foute sjrief”, zag ein van de deilnummers nao aafloup. De tweede kurzes in fibberwarie zit d’r ouch al op, in maart sjtart de derde. En veur ‘ne veerde kurzes in april zin ouch al get aanmeljinge.