Insjikke veur Platbook 21 mèt es thema “Gans greun”

Dialeksjrijvers kinne hun prozatekste en gediechte weer insjikke veur de volgende editie vaan Platbook. ’t Thema vaan Platbook 21 is “Gans greun”. Dat pas bij de lente meh maag op alle meugeleke menere weure ingevöld.

Vaan alle kleure heet greun mesjiens wel de mieste (neve)beteikenise. Dink aon “greun “ in de beteikenis vaan oonervare en naïef en – veural in Limburg – in de zin vaan oongekook, oonriep en puur. Letterlek steit “greun (grei)” veur greunte en kruie. En allewijl steit “greun” dèks symbool veur milieuvruntelekheid. De höbs beveurbeeld greun partije, greun boere en greun maotregele (windmeules, wermtepoompe ezw.). Kort gezag: inspiratiemeugelekhede genóg!

Insjikke veur 15 aprèl

Veur Platbook 21 kinne eige verhaole, gediechte en columns in ein vaan de väöl Limburgse dialekte weure ingesjik. D’n teks maag neet mie es 600 wäörd bevatte en kint tot 15 aprèl aonstaonde weure aongelieverd bij Oetgeverij TIC via paul@uitgeverijtic.nl.  

Sjrijvers boevaan ’t werk weurt geselecteerd door de redacteur vaan Platbook 21 ontvaange e gratis exemplaar en ’n oetnudeging veur de bookprizzentatie. Wee de redacteur is vaan dees editie weurt later bekind gemaak.

Euver Platbook

Platbook is ’n serie dialekbeukskes veur Limburgstaolege sjrijvers en lezers. Auteurs oet de ganse provincie wèrke mèt um ederskier weer ’n opvallend thema te besjrieve. Veur eder editie maak ’nen andere, bij ’t thema passenden redacteur, ’n selectie oet de tekste en sjrijf ’t veurwoord. Platbook weurt oetgegeve in opdrach vaan ’t Hoes veur de Kunste Limburg en kump tot stand in samewèrking mèt Veldeke Limburg, de Raod veur ’t Limburgs, de Stiechting LiLiLi, Oetgeverij TIC en Wim Kuipers (de bedinker vaan ’t Platbook-konsep). Platbook is veur € 9,90 te koup in de webshop vaan oetgeverij TIC

← Ga terug