Interview in Plat-eweg mèt Guus Urlings euver vastelaovendsbuut

In ‘t radioprogram Plat-eweg vaan koumende zaoterdag 13 november (13.00 tot 16.00 oor) zal prizzentator Henk Hover ‘n interview hawwe mèt Guus Urlings euver de door häöm gesjreve historie vaan de Limburgse vastelaovendsbuut. ‘t Beukske Gekheid, mer neet boete de schraom. De carnavalsbuut in Limburg, is ‘t twiede deilke oet de Nachtegaalreeks die oetgegeve weurt door ‘t LGOG en Veldeke Limburg.

De bezunder vörmgegeve monografie bevat ‘n korte historie vaan de vastelaovendsbuut en ‘n blomlezing vaan vastelaovendstekste en buutte in de origineel  Limburgse taol, veurzeen vaan ‘n Nederlandse vertaoling. Noe de festiviteite roond de opening vaan vastelaovend weer in ‘t water dreige te valle, is dit mesjiens ‘n gooj reie um get vastelaovendssfeer op te snouve oet e beukske.

‘Gekheid, mer neet boete de schraom’ is te koup veur € 10,00 (exclusief versjikkoste) . Geer kint ‘t bestèlle bij LGOG of bij Veldeke. Dao vint geer ouch ‘t  ierste deilke oet  de Nachtegaalreeks: Pim Thielen, Den duvel van de middig goof ós vriej. De dichter Paul C.H. van der Goor (1932-1983).

 

← Ga terug