Tekste insjikke veur Platbook 19 mèt es thema “Wie water en vuur”

Limburgse sjrijvers en diechters kinne tot 15 aprèl hun tekste aonlievere veur Platbook 19 mèt es thema “Wie water en vuur”

Redacteur is deze kier Octavie Wolters

In ’t veurjaor vaan 2018 versjijnt de 19e edit8ie vaan Platbook, ‘ne bóndel mèt literair tekste in de versjèllende dialekte vaan ’t Limburgs. Eder editie heet ’n ander thema en ‘nen andere bekinde Limburger es redacteur. Deze kier is ’t thema ”Wie water en vuur”, in d’n hoop tot de tegestèlling tot väöl inspiratie en good literair werk zal leie. Redacteur is deze kier de Remundse sjrijfster Octavie Wolters, die mèt häöre roman “Voorland” in 2017 debuteerde en medein genomineerd woort veur de Sjiek Literatuurpries.

Limburgse sjrijvers kinne tot 15 aprèl 2018 eige werk insjikke veur Platbook 19. Dat kinne beveurbeeld verhaole, gediechte en columns zien; es ze ziech mer op ein of ander meneer verhawwe tot ’t thema. De inzending maag neet mie es 600 wäörd bevatte en kint aongelieverd weure bij Oetgeverij TIC, d’n oetgever vaan Platbook, via paul@uitgeverijtic.nl . Sjrijvers vaan wee werk weurt geselecteerd oontvaange ’n oetnudeging veur de bookprizzentatie en e gratis exemplaar vaan Platbook 19.

Euver Platbook

Platbook is ’n serie dialekbeukskes veur Limburgse dialeksjrijvers en -lezers. Auteurs oet de ganse provincie wèrke mèt um ederskies weer ’n opvallend thema te besjrieve in hun eige verhaole, gediechte en andersoortege tekste. Veur eder editie maak ’nen andere, bij ’t thema passenden auteur ’n selectie oet de tekste en sjrijf e veurwoord.. Platbook weurt oetgegeve in opdrach vaan ’t Hoes veur de Kunste Limburg en kump tot stand in samewèrking mèt Veldeke Limburg, de Raod veur ’t Limburgs , de Stiechting Lilili, oetgeverij TIC en Wim Kuipers (bedinker vaan ’t Platbook-konsep).

Kiek veur mie informatie euver ’t Platbook op www.hklimburg.nl/platbook of www.uitgeverijtic.nl. Platbook is veur € 9,90 te koup in de Webshop vaan ’t Hoes veur de Kunste en bij de betere bookhandel in Limburg.

 

← Ga terug