Jan Moonen beneump tot ierelid vaan Veldeke Limburg

Tijdens de kontakdaag vaan alle lokaal Veldekekring in Weert heet veurzitter Christine van Basten Jan Moonen beneump tot ierelid vaan Veldeke Limburg. Heer woort daomèt beloend vaanwege zien groete verdeenste veur de vereineging es bestuurslid vaan de Veldekekrink Weert. Veurtot heer zie Veldeke-spengske es bewies vaan zien beneuming op zien revers kraog gespangk, laos de veurzitter ’n imposante lies veur vaan alles wat Jan de aofgeloupe jaore heet gepresteerd veur Veldeke, neve tot heer sikkertaris waor vaan ’t lokaal bestuur.

Um mer ins get te neume: heer organiseerde tal vaan excursies en oetstepkes veur de lede vaan de krink, heer regelde de oetreiking vaan de Veldeke literatuurpries Wieërt, heer waor betrokke bij ’t opzètte vaan Wieërts Preuve, heer regelde cursusse Wieërts leze en sjrieve en de sjrieverskrink Wieërt, heer zaot in de redactie van versjèllende beuk in ’t Wieërts, heer zaot in de werkgróp dee d’n declamatiewedstrijd organiseert, evenes in de gróp dee de Wieërtse sjeurkalender oetgaof, bij ’t plaotse vaan de dialeksjèldsjes in de gemeinte en ouch nog naomes Veldeke bij d’n dialekmusical Rogstaekers. En daan höbbe veer nog lang neet alles geneump.

Reie genóg um Jan Moonen tot ierelid vaan eus vereineging te beneume en häöm op te numme in de illuster lies vaan zien veurgengers. En aofgaonde op ’t applaus oet de zaol waor ederein ’t doa vaan harte mèt eins.

← Ga terug