Jaor van de Limburgse dialecte aofgeslote

’t Zal uuch neet oontgaange zien tot 2016 door Veldeke Limburg waor oetgerope tot ’t Jaor vaan de Limburgse dialekte. Nog noets heet eus Limburgse taol zoe in de belaankstèlling gestande wie verleie jaor. De gezètte stoonte vol devaan en ouch op radio en tèllevisie waor genóg aondach veur wat Veldeke geïnitieerd had. Ouch de wetensjap leet vaan ziech hure in de persoen vaan Leonie Cornips, die oonvermeujbaar bleef getuige vaan ’t perfiet wat kinder kinne höbbe vaan ’n twietaolege opveujing.

Wijer waor dao ’t zjubeleibook Veldeke 1926/2016 vaan historicus Luc Soeters, boe-in oetveureg de 90-jaorege historie vaan dialekvereineging Veldeke oet de deuk weurt gedoon, mèt alle huugte- en deeptepunte die zoe’n lang periood mèt ziech mèt bringk. Daan waor dao de zjubeleitoer ”Limburgere 2.0”, ‘nen theatershow dee door de provincie vol zaole trók. Al waor ’t ‘n dreuveg momint wie ein vaan de hoofrolspeulers, Bert Kop, kort nao aofslete vaan d’n toernee kaom te euverleie. En daan hadde veer nog ’n reizende expositie “Boe Limburg gruuts op is”, mèt de oetkomste vaan ’n roondvraog nao de leukste Limburgse wäörd en gezègdes, recepte, meziek en zoe wijer.

Neet allein Veldeke Limburg doog vaan ziech spreke. Hiel get lokaal kring maakde daankbaar gebruuk vaan ’t extra budget wat Veldeke Limburg besjikbaor had gestèld um bezunder activiteite op te zètte. ’t Zouw te wied veure um die allemaol te neume meh hiel bezunder waor de veurstèling die Veldeke Krink Venlo brach mèt ’n ode aon Sef Cornet. Ouch de Krink Remund organiseerde ‘nen aovend mèt dialekmeziek en –veurdrachte. Veldeke Krink Mestreech heelt roond Keersmes ‘ne speurtoch veur kinder dee váöl belangstèlling trok.  

Meh ’t waor neet allein Hosannah in ’t Jaor vaan de Limb urgse dialekte. Dao koum nogal get kritiek vaan versjèllende lokaal Veldeke Kring tot ’t Provinciaol bestuur te väöl op eige huitsje geopereerd had. Dao waor vaan al georganiseerd zoonder tot die kring devaan wiste, laot stoon inspraok hadde gehad. ’t Provinciaol bestuur moot mie facilitere en minder zelf organisere, waor euveral te hure. Dat heet ’t bestuur ziech aongetrókke! Op de Algemein Ledevergadering is aofgesproke tot ’t bestuur mèt alle kring die dao behoofte aon höbbe, in gesprek geit um in de touwkoms tot ’n beter aofstumming te koume. Die gesprekke vinde momenteel plaots en veer hawwe uuch op de huugte vaan de rizzeltaote.