Jaorbook 2016 Veldeke Limburg geprizzenteerd

Op vriedag 21 aprèl is in de Preuverie de Nassaurie in Grathem ’t ierste exemplaar vaan ’t Jaorbook 2016 vaan Veldeke Limburgs euverhandeg aon dr. Georg Cornelissen. Georg Cornelissen is verboonde aon ’t Institut für Landeskunde und Regionalgeschichte in Bonn en is gespecialiseerd in de dialekte vaan Niederrhein, aon d’n andere kant vaan de grens mèt Duitsland. ’t Jaorbook woort häöm geprizzenteerd door de redactiecommissie die bestoont oet Pierre Bakkes, Ton van de Wijngaard en Peter Klein.

’t Jaorbook bevat wie gebrukelek weer ’n käör aon artikele euver hiel versjèllende oonderwerpe, die oeteraard wel allemaol op ein of ander meneer mèt de Limburgse taol of volkscultuur te make höbbe. Zoe notere veer oondermie:

· ‘Het Maastrichts en de dialektenquête van Pieter Willems uit 1885’ door Flor Aarts
· ‘De verkieërdje spellinge um, un, unne, ut in teksten in ‘t Limburgs’ door Pierre Bakkes
· ‘De inmaak’ door Netty Engels
· ‘Limburgisch: Ein Dialekt feiert Geburtstag (2016)’ door Georg Cornelissen
· De ‘Touwspraok bgv aanvaarding besjermhiersjap Veldeke’ door gouverneur Theo Bovens
. ‘n Volksculturele bijdrage vaan Els Diederen euver ‘t gebruuk vaan pötte en pole in Limburg veur d’n aonlègk vaan de waterleiding

Lede vaan Veldeke die dat höbbe opgegeve oontvaange binnekort ’n exemplaar vaan ’t Jaorbook per pos. Wee ziech heet opgegeve veur de digitaal versie vaan ’t Jaorbook, krijg dat binnekort per mail touwgesjik. Neet-lede kinne ‘t Jaorbook bestèlle in euze webwinkel of via ‘t Huis voor de Kunsten. De pries is € 20,00 (exclusief versjikkoste).

← Ga terug