Jean Frins promoveert op Frans Erens, de Limburgsen Tachteger

Op donderdag 9 september verdedegde Jean Frins (1982) aon de Rieksuniversiteit Groninge zie proofsjrif  Gendelettre. De vormende jaren van Frans Erens, 1857-1893. De neerlandicus en germanis sjreef de dissertatie op instigatie vaan ziene Pariese werkgever, Sorbonne Université.

Es student wijde Frins zien doctoraolscriptie aon de Limburgse dialekte, meh es oonderwèrp veur zie proofsjrif koos heer veur ’n ander leefde: Frans Erens. Naotot Frins es 16-jaorege gymnasias mèt ’n spreekbeurt euver Erens’  biografie Vervlogen jaren e gans lèsoor Nederlands had gevöld, contacteerde ziene lieraar Ben van Melick Erens-kinner Harry G.M. Prick mèt de wäörd: “Iech höb dienen opvolger oontdèk.” Prick begós medein ’n breefwisseling die Frins stimuleerde um Nederlands te goon studere.

Gesprekke mèt Miekie Schoenmaeckers-Erens

Ouch later bleef Frins ziech bezeg hawwe mèt Frans Erens. Zoe publiceerde heer in 2009 ’n artikel euver de Limburgsen tachteger in De Maasgouw en leet heer vaanaof 2013 werk versjijne vaan oonder andere Emile, José en Frans Erens en vaan Frans Erens’ lierling Frits Roosdorp. In 2017 bezeukde heer Miekie Schoenmaeckers-Erens, ‘t daan 95-jaorege nisje vaan de sjrijver. Zie bleek euver häör in 1935 gestorve noonk te kinne vertèlle esof ze häöm pas nog gesproke had. ’t Bleef neet bij ein viziet. Orelang praotsessies volgde, boevaan Cilia Erens, kleindochter vaan Erens’ broor, d’n hagiograaf Emile, opnaomes maakde.

’t Woort drök bij de gesprekke in Miekies Amsterdamse stadsvilla. De lètterkundege Dick van Halesema en Lien Custers en Bernard Asselbergs, zoon vaan Anton van Duinkerken, wouwe dao getuige vaan zien, want zoe kort bij de sjrijver vaan Vervlogen jaren zouwe ze noets mie kinne rake. Wie de Sornbonne Frins e jaor later aonzat um werk te make vaan e promotieoonderzeuk, veel alles op zien plaots. Gein ander oonderwerp es Frans Erens laog mie veur de hand. Oonderwijl heer colleezjes bleef geve – neve in Paries ouch aon de Universiteit vaan Belgrado – sjreef Frins ieferteg wijer. Exak twie jaor en zès maond nao de start vaan ’t projek plaotsde zien promotore Mary Kemperink en Kees Snoek hun handteikening oonder ’t rizzeltaot.

Gendelettre

D’n titel Gendelettre verwijs nao de gelieknaomege, in 1891 versjene, Pariese sleutelroman vaan Erens’ vrund Paul Belon, boe-in dee de Sjaesbergeneer opveurt es titelpersonaasj en häöm portrètteert es prototypische maan vaan de lèttere. ’t Is ein vaan de väöl bezunderhede die Prick noets heet beleech in zien Erens publicaties. Ouch daodoor bevat Frins’ book tal vaan primeurs. Zien Gendelettre beejt ’t woonderleke verhaol vaan ‘nen ambitieuze Sjaesbergse jong dee zoewel in Paries es in Amsterdam binne de kortste kiere ‘ne bekinde sjrijver wis te weure. ’t Is e verhaol vol alcohol en Blomme vaan ’t Koed, meh ouch vaan innege vrundsjappe en leefde veur Zuid Limburg.

Gendelettre weurt verriek mèt neet ieder herdrökde tekste vaan Frans Erens, De studie is te kriege vaanaof maondag 13 september 2021 es geïllustreerden hardcover, tèlt 564 pagina’s en kos € 52,50 (ISBN 978-90-826310-7-4

Foto: Jean Frins en Miekie Schoenmaeckers-Erens († 16 juli 2018) op 20 juni 2018 gefotografeerd door Cilia Erens.  

← Ga terug