John Coenen óntvingk Veldeke Oeuvrepries 2022
Iervolle ónderscheijing veur Mestreechse componis, teksschriever en zenger.
Mestreechtenaer John Coenen (1945) óntvingk dit jaor de Veldeke Venlo Oeuvre-Pries van ’t Limburgse Leed. Veurzitter Henk Buskes van Veldeke Venlo makde det bekind in ‘t L1-radioprogramma Plat-eweg van Henk Hover. John reageerde verheug op de toekinning van dees jäörlikse ónderscheijing. De leedjesmaker en zenger wuurt mit de pries geierd veur zien umvangrieke oeuvre en zien verdeenste veur ‘t Limburgse leed. John Coenen óntvingk de pries op zaoterdaag 17 september tiejes de Nach van ’t Limburgse Leed in Venlo.
Taai Taai
De mezikale loupbaan van John Coenen deurt inmiddels zón zestig jaor. As zenger is hae waal al ‘nen tied gestop, maar as schriever is de Mestreechtenaer nog altied actief. Beej ‘t groeëte publiek is Coenen veural bekind as lid van ’t duo Taai Taai det hae in 1996 starde. In ierste instantie is Jos Wolfs ziene zengpartner, maar dae woort al rap opgevolg door John Dams. Mit hits as Viva Tirol, De Alpen expres en Roed zien de roeze wet Taai Taai zich ouk landelik in de kieker te speule. Veur die periode speult en zingk hae beej de dialekband Fietsefreem en nao Taai Taai bouwt Coenen vanaaf 2004 ‘n moeëje solocarrière op.
As componis en teksschriever schreef Coenen leedjes veur allerhande Limburgse artieste. Regelmaotig deej hae det mit collega Guus Smeets, dae in 2013 de Oeuvre-Pries in óntvangs meugde neme.
Ingelstalig
Veurdet Coenen zich op ‘t Limburgse leed stort, is hae iers actief in dansorkeste en later in de Limburgse popscene, waobeej hae in bands as The Walkers en The Press speulde. Ouk veur dees bands schreef hae leedjes. Zelfs de Amerikaanse ster Telly Savalas nimp repertoire van Coenen op. Ouk de dialeknummers van John Coenen blieve in ‘t boeteland neet ónopgemerk: beej internationale sterre as Hansi Hinterseer en Andreas Gabalier staon vertaalde leedjes van John op de setlies.
Gestop
Óndertösse is Coenen gestop mit optraeje. De spanning die idders kier weer gepaard ging mit ‘t op ‘n podium staon, is dao ein oorzaak van. Coenen mak waal nog altied meziek in de studio achter zien woeënhoes. Regelmaotig schrief hae nog niej repertoire en nimp hae sferische instrumentale meziek op.
De Veldeke Oeuvre-Pries van ’t Limburgse Leed
Veur de zestiende kier reik Dialekvereiniging Veldeke Venlo de Oeuvre-Pries oet. Det dit steevas tiejes de Nach van ’t Limburgse Leed gebeurt, ónderstreep de bezóndere samewerking die d’r tösse de vereiniging en ‘t festival is. De pries geit idder jaor nao ‘ne persoeën of groep mit jaorelange verdeenste veur de Limburgse dialekmeziek in en boete de provincie. De winnaer krieg ‘n kunswerk gemak door Mariëlle Franssen en ein oeërkonde.
Motivatie Dialekvereiniging Veldeke Venlo
Veldeke Venlo-veurzitter Henk Buskes: ‘John Coenen haet ’n oeuvre um geej taege te zegge. Vuuel minse kinne um van Taai Taai, maar hae haet nog vuuel mier gedaon. Zoeë zoot John in hiel waat bands en schreef hae tal van leedjes, zoeëwaal veur zichzelf as veur andere. Weej as Veldeke Venlo zien ónder d’n indrök van alles waat hae decennialang haet gedaon en vinde John Coenen ‘n waerdige toevoging in ‘t moeëje rieke van winnaers det weej óndertösse hebbe. Wie weej um benaderde, reageerde John erg verras en positief.’
John Coenen
‘Ik veulde mich zier verierd wie ik door Veldeke woort benaderd. In ‘t begin waas ik ech flabbergasted, um ‘t op zien ‘Limburgs’ te zegge. Ik kós de pries al. Det ik op dees meneer geieërd waer veur waat ik heb gedaon is prachtig. As ik kiek nao de ierdere winnaers dan zien ‘t stök veur stök minse die hiele moeëje nummers hebbe aafgeleverd, ein bietje ein dwarsdoorsneej qua meziekstiele. Hiel moeëj det ik dao vanaaf noow tösse meug staon.’
Ierdere winnaers van de Veldeke Oeuvre-Pries:
2021 Ton Engels
2020 Arno Adams
2019 Neutjesrang (Paul Nagelmaeker †)
2018 Gé Reinders
2017 Henk Steijvers
2016 Thei & Marij
2015 Jack Vinders
2014 Um en Um
2013 Guus Smeets †
2012 Nol Wassen †
2011 Ben Verdellen
2010 Sjef Diederen †
2009 Wooden Chain
2008 Hannelore Winter
2007 Jan Theelen †
Oetreiking
De Veldeke Venlo Oeuvre-Pries wuurt dit jaor veur de zestiende kier oetgereik. Traditiegetrouw gebeurt det tiejes de Nach van ’t Limburgse Leed in Venlo, welke plaatsvindt op zaoterdaag 17 september. Nao tweeë jaor aafwezigheid is ‘t gratis dialekmeziekevenement weer truuk, mit tal van optraejes op verschillende locaties in de Venlose binnestad.