Keersemes speurtoch Veldeke Mestreech weer e groet succes

Veldeke Mestreech organiseerde op 10 december hunne jaorlekse speurtoch door de stad in keersemes stumming. Mer leefs 340 deilnummers, vaan joonk tot aajd,  trokke deze kier drop oet um vraoge te beantwoorde en op hun formuleer te notere. De speurtoch leep dit jaor gans door Wyck en daodoor waore weer ins ganse ander straote en pleinsjes aon de beurt um bekeke te weure, zoe wie ’t Kaleminsträötsje en ’t Kattesträötsje. En euveral mós me op zeuk nao typisch Mestreechse wäörd of beelde.

Zoe mós bij Hotel Beaumont ‘t volgende rijmpselke weure ingevöld: Vreuger wèrkde de obers/kelners in Hotel Beaumont hiel sjiek; zwarte brook, wit humme en e strikske. Wie hèt zoe strikske in t Mestreechs? Völt in.

’t Strikske vaan miene noonk Ties,
steit hiel sjiek op zie nui humme.
Wèts diech tot veer zoe strikske
e ………………………………… neume?  

Bij trökkoms in ’t Centre Cèramique boe de speurtoch ouch vertrokke waor, hadde de deilnummers ruim 4 kilometers vaan ‘n sjoen wandeling drop zitte. Mèt hölp vaan de nudege fouragering oonderweeg. De antwoorde op de vraoge zien te vinde op de website vaan de Veldeke Krink Mestreech.