Kènjer van hie: e nostalgisch leed veur Limburgse expats 

Marcel Maassen is eine van de väöl Limburgers die eus provincie höbbe verlaote um örgens anders in Nederland of in ’t boeteland hun gelök te beprove. Meh heer bewaorde veur Limburg en bezunder pläötske in zien hart en oontdèkde tot veur väöl ander “expats” ’t zelfde gelt. Heer vertolk noe die geveules in e leed in ’t Gelaens dialek vaan zien jäög mèt es titel “Kènjer van hie”. De portée is dudelek: boeste ouch in de wereld terech kumps, de bis en blijfs e keend vaan Limburg.

Marcel leet d’n teks vaan zie leed veur alle zekerheid op spelling controlere door Veldeke in de persoen vaan Huub Clerkx dee evenes Marcel oet Gelaen aofkomsteg is.  De lèste regels vatten ‘t leed sjoen same:

En of-s te hie blifs of dat-s te geis
dit geit noats veurbie:
doe bès ‘n kèndj van hie
dit geit noats veurbie:
doe bès ‘n kèndj van hie

Allemaol, allemaol
kènjer van hie.
Al wae oats
hie woort gebaore
dae blif al zien laevesjaore
èns en veurgood
eine van ós.

Same mèt e stèl vrun zat Marcel “Kènjer van hie” in de studio op meziek en maakde daoneve ouch nog ’n prachtege videoclip debij. In die clip gebruuk heer nostalgische beelden die bekans allemaol gemaak zien door amateurfèlmer Cees Berkelaar (1916-1974) oet Vinkeveen. Berkelaar kaom mèt zien hoeshawwe dèkser in Zuid Limburg op vekantie en fèlmde dao ouch regelmaoteg, veural in en roond Schaesberg, boe zien femilie woende. ’t Zien beelde vaan ’t leve vaan ederen daag: ‘ne späölselkesmiddag, ‘ne sportdaag, e communiefies.

Meziek en beelde vaan “Kènjer van hie” kint geer bekieke op Youtube en dat lievert ’n bezunder kiekervaring op. Lèt ouch op ’t ind vaan de clip, boe versjeie expats de compleminte doen aon Limburg.

(Mestreechs/Gelaens)

← Ga terug