“Kirchroa jeet plat” in bekans gans Limburg

Zevende editie vaan dialekspektakel op lokalen TV

Kirhroa jeet plat is ’t twiejaorleks dialekspektakel wat noe gereid is veur de zevende editie. De Wèrkgróp Dialek vaan de gemeente Kèrkraoj heet alles draon gedoon um dao e boejend en aofwisselend program vaan te make én e program wat veur ederein veileg is um te bezeuke. Daorum is deveur gekoze um ’t festival neet live te doen meh op te numme en via lokaal tèllevisiestations oet te sjikke en in de loup vaan ’t jaor op YouTube te zètte.

Drei programs vaan ein oor

Op 10 oktober aonstaonde weure in De Buun in Kèrkraoj tèllevisieopnaomes gemaak vaan 28 dialeksjrijvers oet de ganse provincie, dao trejje mer leefs 6 muzikaol acts op en versjèllende toneelvereineginge bringe sketches, zoetot veur ‘ne lach en ’n traon gezörg weurt. De bedoeling is tot dao drei tv-programs vaan ’n oor weure gemaak, die via RTV Mestreech, TV Valkeberg, TV Heuvelland, TV landgraaf, TV Ellef en ML 5 op door hun zelf te bepaole tiedstippe weure oetgesjik. Op zoe’n meneer zalle dao mesjiens wel mie bezeukers aon ‘t festival zien es oets vaan te veure. ’t Program weurt aofgewisseld mèt korte interviews en ‘ne kwis, boebij veur de winners drei complete pakètte vaan de dialekbokeserie Platbook gereid stoon.

Gei live publiek

“Wie veer veureg jao mèt de veurbereiinge begóste, höbbe veer zelfs Teams-vergaderinge gehawwe um mèt ein te kinne euverlègke wat noe de bèste meneer waor um Kirchroa jeet plat door te kinne laote goon”, zeet programmeur Paul Weelen. “Dao waor väöl oonzekerheid en dus waor dit de bèste optie. Gelökkeg wèlle zoe väöl lokaal stations mèt wèrke. Jaomer genóg kint daan gei live publiek bij de opnaomes aonwezeg zien. Veer mote zoe väöl meugelek stèlte bewaore.”

Artieste oet de ganse provincie

Kirchroa jeet plat weurt financieel meugelek gemaak door de gemeinte Kèrkraoj. Meh al suggereertde naom mesjiens anders, dao trejje neet allein artieste oet Kèrkraoj op, in tegendeil. Meh ’t protgram hèt neet veur niks zoe, netuurlek zal dao wel degelek väöl Kirchröätsj te hure zien. “Veer hope tot Limburg ope steit veur e program wat zoe hèt, meh veer zien zeker devaan tot dao veur eder get wèls is.”

Artieste die mèt doen: Mella Klaessen, Hans Emmen, Ton Custers, Wiel Hamers en vrun, De Hoos en Baltus & Co. Auteurs die meedoen o.a.: Will Wintjens, Wim Kuipers, Vivianne Rijnders., Lizette Colaris, Maurice Hinzen, Annie Tummers, Loek van de Weijer, Marc Didden, Raymond Clement, Fer Kousen en väöl, väöl andere. Toneelvereiniginge Excelsior en Frohsinn zörge veur de sketches.

Veur mie informatie kint geer terech bij Pauil Weelen: 043-3262414

 

← Ga terug