“Klankleer van het Hasselts”, rizzeltâât van ʼn ech monneke werrek

Op zoaterdaag 10 fibbrewâre 2018 woard ter ènne roadzââl van ʼt staddéûs van Hasselt de “Klankleer van het Hasselts” veer­ge­stèld. Dees pubblekâse va bekan 800 bladzèèden ès ʼt rizzeltâât van ʼn ech monnekewerrek dur otttéûr Marco Clerinx, dieë doaveer obbe hellep va Xavier Stae­lens moch rieëkene. Op Marco z’ne palmarrèès stoan euch al ʼn vernéûde éût­gaaf vannen “Dieksjenèèr van ʼt (H)essels” èn vanne “Grammèèr van ʼt (H)essels”. Bè deze Klanklieër zèt Marco Clerinx, dieën euch veerzitter ès va Veldeke Hasselt vzw, de króéen obb’t werrek ènne vèrrem van ʼn seríé va drèè bejk ever ʼt Hes­sels diejal­lek.

Abselejt vandouen virre lèssen Hessels

Bèda va sènd te seventiger joare vanne verige íéf mieër èn mieër aars hin kènger nemíé langer èn ʼt diejallek opgetroeken hèbbe, zèn ter zjinnerâses Hesselieëre gróéetgewoare, dee gin of toch mar híél mèn “Hessels” kunne sprieëke. Tervir zèrrege da da diejallek blif bestoan kan mar obb’íén mannejer, ʼt ès te zègge bè ʼn néû liechting Hesselssprieëkende te krëjere. Ma bèda zeʼt diejallek ni èn hin téûs- of wèrreksittewâse kunnen oppieke, ès ʼt âân­lieëre doavan bekan allíén nog mar megelek dur lèsse te vollege.

Ve loaten hèè ottéûr Marco Clerinx zellef effekes an ʼt woard:

ʼt Importantste doel bè’t make vanne heréûtgaaf vanne “Grammèèr”, de mieër gebréûks­vrien­deleke edejse vannen “Dieksjenèèr” èn néû dus euch te “Klankleer” weur toch wel ʼt kunnen offrere van handbejk, abselejt vandouen vir ʼt Hessels obb’n effisjente mannejer te kunnen âânlieëre. Ènne tachtiger joare hèt Xavier Staelens den “Dieksjenèèr” uitgebroch èn hèt ʼm èntsjige lèsseseríés gegeuve. Èn ʼt noajoar va 2011 bèn iechsellef dan opnéû gestart bè lèsseseríés van 11 oavende van èllekeskieër 2 ouere. Èn tottââl hèbben èn al dee joare toch al zoe’n honderdtal persóéene dee lèsse gevolleg. Nog mar èntsjige wieëke trèk woart te ellefste lèsseseríé aafgerond bè e schriftelek ègzame. De 10 kursiste dee terdeur weure, krege touen de felbegieërden deplom va “Bachelor èn Hesselse stejdes” éûtgerèèk.

Klanklieër: Praktis

De “Klankleer van het Hasselts” wieërt éûtgegeuve dur Veldeke Hasselt vzw. Dees èn 2002 opgeriechde veríéniging èèvert vir ʼt behaag, de bescherreming ènne premeuse van ʼt Hessels diejallek. De bouk ès te verkrèège bè Standaard Boekhandel anne prèès va €29,50.

(Hessels)

← Ga terug