Kookbeuksjrijfster Netty Engels-Geurts gestorve
De oet Roggel aofkomstege en in Thull woenende kookbeuksjrijfster Netty Engels-Geurts is op 24 juli oonverwach gestorve. Netty Engels-Geurts kraog veural bekindheid door häör book “Vlaai en ander Limburgs gebak” boevaan drök nao drök de weeg nao de lezer voont, ouch in tije vaan digitalisering. In september 2018 versjeen häör veertegste kookbook “Limburg op zijn lekkerst” in ’n zjubelei-editie bij ‘t 20-jaoreg zjubelei vaan oetgeverij TIC. Op 19 juni jl. kraog Netty veur häör verdeenste op volkscultureel gebeed noch de Jo Hansenpries oetgereik.
Promotor vaan de Limburgse keuke
Meh häör ideale brachte häör väöl wijer. Op de ierste plaots waor zie promotor vaan de Limburgse keuke. Zie traoj op es adviseur vaan restaurants, verzörgde workshops en gaof demonstraties euver ’t koke en bakke vaan Limburgse recepte. Dèks traoj ze op veur de radio en tèllevisie en einegen tied had ze ouch ’n eige kookrubriek. Ouch in de Commissie Volkscultuur vaan Veldeke maakde zie ziech sterk veur de Limburgse keuke en verzörgde jaorelaank ’n recepterubriek in ’t Jaorbook vaan eus vereineging. Op de website vaan de Alfabrouwerij verzörgde zie recepte mèt beer. Ze maakde ziech ouch sterk veur vergete fruit wie kornoelje of kweepeer.
Actief in Afrika
Door häör werk es coach veur kinder mèt ‘ne geisteleken handicap reisde ze mèt maan en dochter de ganse wereld euver. Ze maakde ziech de liermethood vaan d’n israëlische professor Feuerstein eige en oonderwees tal vaan kinder die door andere waore opgegeve, in leze, sjrieve en rekene. Ze gaof workshops, cursusse, lezinge en veurliechting in len wie Tsjechië en Rusland. Netty en häöre maan Wil hadde sinds einege jaore ’n nui stiechting PIT opgeriech, die ziech speciaol riechde op Afrika. Met naome in Kenia zien ze de lèste jaore väöl gewees um ’n eige program op te zètte veur kinder mèt ’t syndroom vaan Down, die dao dèks verwaarloes weure.
E paar weke geleie woort ‘nen hersentumor bij häör geconstateerd. Nog veurtot ’n operatie en kuur kóste plaotsvinde volgde ’n hersebloojing, boenao ze in coma raakde. Netty Engels is 77 jaor aajd gewore. Ze is in beslote krink gecremeerd.