Kringe Kontak Daag Veldeke Limburg in Remund

Naotot ’t twie kier waor oetgestèld in verband mèt corona, kós op zaoterdag 10 september daan eindelek weer ‘ne Kontakdaag vaan de Veldekekring plaotsvinde. Gashier waor deze kier de Krink Remunj en die hadde ziech e sjoen program laote invalle.

D’n daag begós – wie kint ’t ouch anders – mèt koffie en vlaoj, die geserveerd woorte in kaffee Aad Remunj, vlakbij de Kepel in ’t Zandj. Daonao woorte de krinkbestuurders en gaste opgedeild in drei gróppe, die eder ‘ne gids touwgeweze kraoge, boemèt ze ‘n roonddleiing euver ’t Aje Kirkhaof  heelte. Dao zien hiel get bezunder verhaole te vertèlle euver de doezende graver die dao te vinde zien, al waor ’t mer umtot dao ouch de Limburgse bisjoppe zien bijgezat (behalve Gijsen, dee dao neet begraove wouw weure, en ouch neet ziene veurgenger Moors, dee per se neet neve Gijsen wouw ligke meh toen nog neet wis tot Gijsen örgens anders begraove wouw weure).

Kepel in ‘t Zandj

Daonao góng ’t nao kaffee Parkzicht veur ‘n al daan neet alcoholische verfrissing, boenao ’t gezèlsjap weer woort opgesplits. Ein deil góng nao de Kepel en de processiegank, de andere brachte e bezeuk aon ’t Kruuswaegpark en ’t Blometepijt wat dao gelag waor en wat oondanks de rege nog prima debij laog. In de Kepel gaof Yvonne de Vries, die dao al wach had vaanwege de Nationale Monumintendaag, ’n touwliechting bij de historie en de architectuur vaan de kapel. En in de processiegank waor ’t veurmaoleg streektaolfunctionaris Pierre Bakkes dee teks en oetlag gaof bij de doezende tegelkes die in de gaank aon de mör haange mèt devoties veur Maria, vaanaof daank veur ’t hole vaan ’t rijbewies tot veur de behawwen trökkier oet d’n oorlog.

Veldeke Pluum

D’n daag woort aofgeslote mèt e werm en kaajd buffèt in ’t zelfde Aad Remunj boe heer ouch begós waor. Oonderwijl kraog Rob van Deurzen, journalis vaan de Limburger tot zien verrassing nog ’n oondersjeiing oetgereik in de vörm vaan de Veldeke Pluum, es erkinning veur zien beriechgeving euver “klein Midde-Limburgs nuits” in de VIA en zien sjrieve in ’t Remunjs dialek veur de Kaketoegezèt. Riky Simons laos e zelf gemaak gediech veur euver de plaotse boe-aon in de loup vaan d’n daag e bezeuk waor gebrach. En zangeres Willeke Simons zörgde veur e muzikaol intermezzo mèt häör prachteg gezoonge Limburgstaolege leedsjes.

De Veldeke veendel

‘t Besluut vaan de Kontakdaag bestoont oet ’t doorgeve vaan de Veldeke veendel aon de krink dee ziech volgend jaor mèt de organisaties vaan de Kringekontakdaag geit bezeg hawwe en dat is de krink Venraoj, de mies Noordeleke Veldeke krink.

Foto’s Hans Simons

← Ga terug