Lede oonderzeuk Veldeke Krink Mestreech

Veldeke Krink Mestreech is mèt mie es 1400 leie wied eweg de groetste lokale krink vaan dialekvereineging Veldeke. Dat is vaan d’n eine kant e complemint weerd, vaan d’n andere kant zouwste bij zoeväöl leie gemekelek ’t ziech kwiet rake op wat die leie noe zjus vaan Veldeke verwachte.  Um dao-achter te koume heet de Krink Mestreech ’n enquête gehawwe oonder zien leie. Daoveur is ’n online vraogelies roondgesjik die door bekans 700 vaan de leie is ingevöld. Dat waor genóg um e good beeld te kriege vaan hun winse en verwachtinge. De organisatie vaan de enquête waor in han gelag vaan oonderzeuksburo RenM|Matrix oet Mestreech.

Ledebestand relatief aajd en hoeg opgeleid

Ein vaan de ierste dinger die opvalle es veer de oetkomste vaan ’t oonderzeuk bekieke is tot ’t leiebestand vaan Veldeke Krink Mestreech veural oet get awwer en relatief hoeg opgeleide persoene besteit. Dat vaan deen hoege leeftied dat wiste veer al; daoveur hoofste mer de grijs köp te tèlle bij de leievergadering of bij de veurstèllinge vaan ’t Vastelaovendscabberèt. Vaan die hoeg opleiing waor minder bekind; klaorbliekelek zien lui mèt ’n hoeger opleiing get mie geïntrèsseerd in ’t behaajd van de Mestreechter taol. ’t Is wel get um euver nao te dinke, zoewel deen hoege leeftied es die hoeg opleiing. Want dao is gein gooj reie te bedinke veur wat jonger en lieger opgeleide  Mestreechtenere neet betrokke zouwe kinne weure bij ’n dialekvereineging wie Veldeke.

Populariteit Vastenlaovends Cabberèt

’t Zouw te make kinne höbbe mèt de activiteite die de Veldeke Krink Mestreech veur zien leie organiseert. Oet ’t oonderzeuk weurt dudelek tot ’t jaorleks Vastelaovends Cabberèt bij de leie op de mieste belaankstèlling maag rekenen: bekans dreikwaart vaan de leie bezeuk dat Cabberèt eder jaor! Dao kinne de ander activiteite, wie de Keersaovend, ’t Groet Mestreechs dictee en de stadswandelinge neet bij in de buurt koume. ’t Gief ouch aon tot de krink erg aofhaankelek is vaan ’t succes vaan ’t cabberèt. Dat zouw weer ’n gooj aonleiing zien um ins nao te dinke euver ander activiteite, activiteite die ouch en veural jonger Mestreechtenere aonspreke um lid te weure vaan Veldeke. Want anders löp Veldeke ’t risico tot de vereineging op d’n doer laankzaam oetstörf.

Iech spreek ouch Mestreechs tege…

Tot ’t Mestreechs veurluipes nog levendeg genóg is, bliek wel oet ’n ander oetkoms vaan ’t oonderzeuk: mie es 80% sprik die taol ouch tege ’t personeel in de winkel en in de horeca, tege zien naobers en tege wee ze ouch mer tegekoume op straot. En wee ‘ne partner en kinder heet sprik dao ouch miestal Mestreechs stege. Bij kleinkinder is dat daan weer minder ’t geval, ouch al umtot die dèks neet mie in Mestreech woene. En de Veldeke Krink Mestreech maag ziech wat dat betröf ouch ’n veer opsteke: 94% vaan de leie is vaan meining tot de Krink e veurbeeld is veur ederein dee Mestreechs sprik en sjrijf. Tot de Krink elitair zouw euverkoume (boe ze e bitteke bang veur waore) vint ’n groete mierderheid vaan de leie daan weer neet.

’t Oonderzeuk beejt nog väöl mie intrèssants meh dat zouw te wied veure um hei allemaol te behandele. De Krink Mestreech heet in eder geval de koumenden tied genóg materiaol um euver nao te dinke es ’t drum geit ’t touwkomsteg beleid vörm te geve.