Lei Bovens is de winner vaan ’t Groet Mestreechs Dictee 2022
’t Groet Mestreechs Dictee, wat op zoondag 30 oktober woort gehawwe in ’t MECC, is mèt 3 foute gewonne door Lei Bovens. Lei is de broor vaan euzen aajd gouverneur en besjermhier vaan Veldeke Theo Bovens. Meh daoneve is heer ouch nog èlftalbegeleiier bij MVV. Mestreechser kint ’t neet. Lei deit al jaore mèt aon ’t Dictee en behoort ummertouw tot de beter deilnummers. Meh ‘nen ierste pries had heer nog noets gewonne. Meh noe MVV de ein euverwinning aon de ander knuip, kós ’t neet oetblieve tot ouch d’n èlftalbegeleiier mèt ‘ne pries devaandoor góng.
De nómmers 2 en 3 Stephan Giebels en Thea van Thor maakde eder ouch mer 3 foute. De bonuswäörd die aonvöllend aon ’t dictee gegeve woorte, maakde ’t versjèl. Lei had daobij de minste foute. Per persoen woorte gemiddeld 30 foute in ’t dictee gemaak. In totaol naome 115 persoene aon ’t dictee deil, boe-oonder prominente Mestreechtenere wie Theo Bovens, Lou Spronck en Benoit Wesley. Alle deilnummers waore enthousias umtot ’t alweer twie jaor geleie waor tot de lèste editie vaan ’t Groet Mestreechs Dictee plaots voont. Door de pandemie woort ’t evenemint oetgestèld.
André Rieu leus veur
D’n teks vaan dees zevetiende editie vaan ’t Groet Mestreechs Dictee woort gesjreve door Marjorie Rieu, de vrouw vaan André Rieu. André dreug de Mestreechter taol e werm hart touw en heer laos ’t dictee dit jaor zelf veur. Dat maakde dees editie extra speciaol. Tijdens ’t evenemint in ’t MECC woort heer beneump tot “Ambassadeur vaan ’t Mestreechs”. Deilnummer woorte in de poos getrakteerd op ’n optrejje vaan’t Mestreechs Salon orkes en e stökske vlaoj.
Veur de bok z’n kloete
Neve de 77 fanatieke deilnummers die veur de prijze gónge, doge dit jaor ouch 38 enthousiaste persoene aon ’t dictee mèt ‘veur de bok z’n kloete’. Veur väöl lui ’n perfekte oefening um ’t gesjreve Mestreechs te liere. Zie kóste nao aofloup hun dictee zelf corrigere aon de hand vaan d’n officiëlen teks.
Dictee mèt instinkers
’t Dictee mèt es titel ‘Inkel reis Amsterdam – Mestreech’, naom de aoanwezege mèt in e verhaol wie André Rieu al vaan keends aof aon e loepzuver geveul heet veur timing. Zoe kaom heer in 1949 vlak veur zien geboorte zjus op tied in Mestreech aon um gebore te weure es Mestreechteneer. ’t Waor zien wijsvrouw die häöm zien ierste Mestreechse wäördsjes lierde. In ’t dictee zaote, zjus wie ander jaore, e paar instinkers. Veurbeelde vaan Mestreechse wäörd boebij väöl deilnummers de fout ingónge waore: ‘peperkokemennekes’, ‘dirizjent’ en zjuzjuubkes. De completen teks vaan ’t dictee is hei nao te leze.