Lèste Platbook

Platbook is ’n bokeserie mèt gediechte en verhaole in ’t Limburgs vaan de ganse provincie. De prizzentatie vaan Platbook 25 weurt noe veurbereid. Die zouw plaotsvinde op zoondag 14 november um 16.00 oor in Bookhandel Dominicanen in Mestreech meh is aofgelas in verband mèt de aongesjerpde coronaregels. Dao weurt nog gekeke nao e nui momint um de prizzentatie esnog te hawwe.

Dit is ’t lèste Platbook. De redactie veur dees oetgaof woort gevörmp door de zoegenaomde Platbook Commissie, bestaonde oet Wim Kuipers, Hub Nijssen, Ton van de Wijngaard en Paul Weelen. Dao waore euver de 160 inzendinge en dus mós dao ’n streng selectie weure gemaak. Oeteindelek zien mie es 60 bijdrage in ’t book, wat dikker is es normaal, terech gekoume.

Financiering hèlt op

’t Idee tot de belaankstèlling veur sjrieve in de streektaol zouw zien aofgenome, is mèt dit groeter aonbod gelogestraf. Jaomer genóg is de financiering neet mie roond te kriege. De provincie gief gein subsidie mie en de betrokke organisaties (Veldeke, Stiechting LiLiLi, Bureau Streektaal) höbbe zelf de middele neet. Ouch bringk de verkoup vaan de serie neet genóg op um wijer oetgaoves meugelek te make.

Aonvaankelek waor veur Platbook 25 ’n thema vastgestèld: Oet ’t zuje. Meh dat is inkel d’n titel vaan ’t book gewore. Edere sjrijver waor vrij um in te sjikke wat heer of zie wouw. De einege conditie waor tot de bijdrage in ‘ne variant vaan ’t Limburgs mós zien gesjreve. Dat lieverde e zier divers beeld vaan de Limburgstaolege literatuur op.

1600 Pagina’s Limburgtaolege literatuur

De serie Platbook is oetgegeve in de periood vaan 2008 tot en mèt 2021, dat zien 13 jaor. In ’t ierste jaor versjeen 1 deil, in de naovolgende jaore kaome eders kier 2 deile oet. Mèt d’n aofsleter 25 zalle daan 1600 pagina’s Limburgse gediechte, verhaole, songtekste en columns zien gepubliceerd, e volume wat allein door de oondertösse 84 deile tèllende LiLiLi-reeks weurt euvertroffe. Dao zien wieneg streektaolvariante die nog noets drin höbbe gestande, de mies noordeleke en de mies zuideleke höbbe sjrijvers gevoonde die aon ’t thema vaan dat nömmer kóste beantwoorde.

Alle 25 deile zien nog ummertouw te kriege. In sommege bokezake höbbe ze de serie op veurraod. Anders zien de beuk veur € 9, 90 te koup via de webshop vaan d’n oetgever.

Vraog is noe: wat geit mèt de literatuur in ’t Limburgs gebäöre? Veurluipeg is allein eige initiatief, ’n internèt en de LiLiLi euver, boevaan dit jaor ouch deil 85 zal versjijne.

Wèlt geer mie wete euver ’t book, de serie of de auteurs, nump daan kontak op mèt Ton van de Wijngaard (0475-399299) of Paul Weelen (043-3262414).

← Ga terug