De leukste Limburgse wäörd en gezègdes

Verleie jaor heet Veldeke Limburg in ’t kader vaan zie 90-jaoreg zjubelei e beukske oetgegeve mèt de leukste Limburgse wäörd en gezègdes. Dat beukske is samegestèld in samewèrking mèt de Media Groep Limburg, dee in zien gezètte aon lezers ’t verzeuk had gedoon mèt te doen aon ’n enquête. Dao-oet koume de 100 leukste wäörd en de 30 leukste gezègdes nao väöre. Mèt steun vaan de Raod veur ’t Limburgs woort dat beukske gratis aongebooje aon de Limburgse bevolking, die ’t kóste aofhaole bij bibliotheke en ander cultureel instèllinge.

In herdrök

Dat beukske waor zoe succes tot de veurraod binne de kortste kiere op waor. Noe heet de Raod veur ’t Limburgs beslote um nog ins e paar doezend exemplare te laote drökke um aon de vraog te kinne voldoen. Die exemplare zalle oondermie ter besjikking weure gestèld vaan de lokaal Veldeke kring die dao intrèsse veur höbbe, zoetot ze hun lede e plezeer kinne doen. Aon de oetgaof vaan ’t beukske is ouch ’n expositie gekoppeld boe-in de leukste wäörd en gezègdes op peniele zien aofgebeeld en vaan illustraties veurzeen. Die expositie is al op e paar locaties te zien gewees meh bibliotheke die intrèsse höbbe kinne ziech nog via euze website aonmelle en daan numme veer weer kontak op um te bekieke wat meugelek is.

De leukste wäörd volgens de sjaoljäög

De commissie volkscultuur vaan Veldeke heet in ’t verlengde vaan de enquête onder lezers van De Limburger en ’t Limburgs Dagblad ouch nog ’n roondvraog gehawwe oonder Limburgse kinder, um nao te goon wat veur hun de leukste wäörd zien. Die bleke inderdaod nogal aof te wieke vaan wat de volwassene gekoze hadde. Bij de groete lui stoont beveurbeeld “fispernölle” (prutsen) op de ierste plaots en bij de kinder “eiketske” (eekhoorntje). ’t Leukste gezègde voonte de volwassene: “Hae is zoeë vaerdeg wie e kemmuniejeske” (hij is doodmoe). Veer hawwe uuch via euze website op de huugde vaanaof wienie de nui exemplare vaan ’t beukske te kriege zien.