Lidioom: Äöves die gaon shinen

Obbernuuj injde ein aaflevering van Lidioom mit ein vraog (nao eine depe zöch, det waal): riekdóm aan wäörd, waat is det…  Vraog? Dao sjtaon allein puntjes. Ich weit neet of ein antjwaord neudig is. Lidioom is bedoeld veur laezers en sjrievers (die veural), neet veur taalkunders. ’t Geit mich um die Lust am Text, ’t plezeer det me kan höbbe van bezunjer wäörd, nuuj wäörd, sjpele mit wäörd.

Sjpele: sjpitse of depe gedachte, bewaeringe, beeldendj sjrieve heure dao neet gans biej. Sjpele: eine oetzunjerlikke dribbel van Messi, mae de bal kump taenge de paol: plezeer? Minder plezeer es ein dreug gool, die daobiej nag de baeker oplevert? Det zal perseunlik zien, aafhankelik van waat me ’t belangriekste vinjt (’t geit hiej neet um supporters).

Ich bön van de rechte waeg aaf. Daoveur de vraog: zól me eine baetere vertaler of sjriever zien wen me mier wäörd in de pen haet? Die oetdrökking is nag van vreuger, wie de baetere man mit de völpen sjreef. In ein aafgebete potlood zitte ouch wäörd versjaole. Zjuus, en ach: es toeris kan me zich mit doezjend wäörd al aardig helpe. Mae ’t geit hiej um sjrieve, wied minder euver ’t gesjpraoke waord. ’t Limburgs is Riek van klank – de titel van ei book van Veldeke. Ich zól zegke: riek AAN – is det anger idioom?

Mesjiens, mae waat zien taalklanke? Efkes. Ich zeen op de pagina’s 68 en 69 van deil II, aaflevering EIN van ’t WLD mier es dartig versjillende sjpellinge van ’t waord aove, en waal de bak- of bekkersaove.

Dao sjei ich gauw mit oet: al herrie genóg gehad euver die petieterige versjille, en besjloet mit det injde van hiejbaove. Inje is AN ‘eindigen’. Kan det waord waal? Verwórrend? Zuug: hae injde ein tón van ziene naef. Ech Limburgs is det neet: inje es ‘innen’ – angers oetgesjpraoke AN. De houfriddaktäör van de v. Dale behanjelde giester in Trouw de opkóms van ‘t Ingelse waord shinen ofwaal stralen, schitteren. Kiek det maedje oet Gelaen dao ins sjtaon shinen. Sjiene? Nae: die beteikenis hauwe schijnen en sjiene neet.

Reagere? Sjrief nao redactie@veldeke.net

 

Dao zien al mie es daarteg ieder aoflieveringe vaan dees rubriek Lidioom versjene. Geer kint ze trök vinde in eus arsjief.

 

 

 

← Ga terug