Lidioom: de baom is gelag

Idioom-idioticon-idiomaticum: dao höb ich al mier es 1400 wäörd aan besjtaejd en nág neet genauw gezag waat geer van Lidioom verwachte kónt, en waat neet. Bezunjer Limburgse wäörd, det zeker. Aevel veural wäörd die einen teks in ’t Limburgs kleur kónne gaeve, verrieke zelfs. Mót ich nag zegke det die wäörd mien eige keus zien?

Daonaeve kump d’r van Oos Taal neet väöl eigeheimsigs in, aafwiekinge die De Bo waal guf. ’t Begint dao al biej ’t lemma ‘aan’ – ich citeer: ‘De Hollanders gebruiken aan in veel gevallen waar wij bij, in, op, tegen, of van stellen.’

Ich weit neet of det ammol nag zoe zól zien, beveurbeeldj: ‘zich dronken drinken IN jenever’ – det is ouch neet belangriek. Ich mós waal dinke aan ei veurzitsel waat véér volges de Hollenjers kemiekerig gebroeke: hae ligk OP ’t zekehoes. Mót ich zoeget biej Lidioom gaon behanjele? – dach van neet.

Waat waal dan? Jaore geleje bön ich begós mit ein idiomaticum of idiomatisch (waorde?)book van ’t Limburgs. Begós: ’t woor ein óngerdeil van ’t AGL, ’t Algemein Gesjreve Limburgs det ich same mit de betreurde Paul Prikken en Leonie Robroeck zól make. Helaas. Ich höb doe beukskes mit de naam idiomaticum bekeke; dao zoog ich zat materiaal, veurbeeldje in. Veer zólle aevel ’t idioom allein binne ’t Limburgs zeuke, herinner ich mich; dus gein vergeliekinge mit anger tale, gein wäörd die op Nederlandjse of Duutsje wäörd lieke mae get angers beteikene, de insjtinkers.

Ich gaon wiejer mit die prachtige wäörd van ós. Sjtop: die wäörd kan me ouch vinje in de pakweg zevetig Limburgse waordebeuk. Zeker. ’t Geit aevel neet allein um wäörd, ouch wie die te gebroeke. Materiaal, grei (sjpul) veur Limburgers die in ’t Limburgs wille sjrieve, zoe brónsgreun meugelik, mae neet gans ‘t gepeks höbbe veur waat ze wille. Sjriefcursus? Nae: materiaal en veurbeeldje. Ich gaon daoveur vanaaf volgende waek get van det grei op de baom berme. Baom? Dae is noe gelag: de ierste zös aafleveringe van Lidioom.

Dit is de zèsde aoflievering vaan de rubriek Lidioom. Alle veurege aoflieveringe kint geer hei trökleze.