Lidioom: Ein vlek plekke

’t Zeuke nao ei Limburgs waord veur outcast leverde (mich) ei broekbaar waord op veur ei gaat wo miense wone: abbegaat. Is det noe baeter es ‘gehuch’ wiel det zoe Hollesj klink? Naenae: ‘gehuch’  höbbe veer zeker neet euvergenaome. Ich wil waal einen eige variant verzinne: gehäöf – ein verzameling boerderieje (häöf, hofsteden). Klink good: det gehäöf dao achter biej Postert, ich kan neet op de naam kómme… Euverdreve?

’t Guf wiejer nag ’t waord boetenieje, wovan ‘t inkelvoud bietje vraem klink: dees boeteniej; negorie kan weer waal. Dan kómme veer biej ein anger waord veur ein hampel hoezer, det waal AN is: vlek. De houfbeteikenis is: get waat vies, voel is, óngewins, ein sjmet (waordebook Valkeberg). Noe is volges de v. Dale dit ‘vlek’ veur gehucht ei bietje anger waord, dus…

…sjtappe v’r euver nao de waore vlek, die ich ouch waal kwaaj neum. En waat zeen v’r: ‘vlek’ kump neet väöl veur in oos waordebeuk. Det van Remunj zaet: zegke veer neet, waal: plek. Naober Zjwame geit aone aomhaole van vleismeulke nao vlemke (vlammetje). Ouch  ’t waordebook van Mesjtreech is vlekkeloos, behalve vlekke es wirkwaord: plekke gaeve, ‘vlekken’ in ’t Nederlandjs. ’t Waordebook van Zitterd haet ‘vlek’ waal – beteikenis: vlek. Zoe kónne v’r bezig blieve.

En det wól ich effe doon, den mit ‘vlek’ höbbe v’r ein aod Germaans waord biej de sjabbe. En aoj wäörd verangere, van vorm en beteikenis. Wie det ammaol zit, is gein zaak veur Lidioom – waal ’t naevenein zitte van wäörd die femilie vanein zien, krek wie veer ammaol (zaet me) van Karel de Grote aafsjtamme.

Die vies Hollesje vlek kinne veer veural es plek: ze höbbe biej moder ein nutte plek op de lóng gezeen. Ich interpreteer ‘plek’ hiej es: get waat neet normaal is, neet wie: de beste plek op de camping. Trök nao ’t Mesjtreechs vlekke van hiejbaove: plekke gaeve; dao kan me neet ‘plekke’ veur gebroeke, den det beteikentj biej ós ‘plakken’, dink aan ein plekbóks. En plakke … Kump volgende waek.

 

Dit is de 25e aoflievering vaan de rubriek Lidioom. Alle veurege aoflieveringe kint geer trök vinde in eus arsjief.

← Ga terug