Lidioom: Gesjpierde körrelkes

Sjpruutjes kan me meuskes neume, höbbe v’r vurge waek gezeen. Wiejer noe mit ei waord det noer éin letter angers haet: muuskes ofwaal klein muus. Muus? Ich dink det zeve op de teen (echte) Limburgers moeze in hoes höbbe. Sjanj? Taal verangert, en ‘moeze’ is nag altied gein Nederlandjs.  Muuskes zien zeutsige körrelkes die me vreuger op besjute deej wen ei kiendje gebaore woor. Besjuut mit muuskes dus, mae waal muuskes aone sjtert; die zien de Moerdijk euvergezjwómme.

Veur die körrelkes höbbe v’r twie wäörd, get langer mae wied baeter, vinj ich – mae waat is baeter? Ich lanceer ’t duo sókkerkäörkes en moezekeutelkes. Noe pas op: die bulkes hote vreuger ouch in Hollandj muizenkeuteltjes. ’Muisjes’ is kórter, en zakeluuj höbbe min tied. Hauwe veer daoveur mit mótte gaon en van *moeskes of moesjes kalle?

Sókkerkäörkes. Ich bön bang det käörke (korreltje) ei bao vergaete boerewaord is. In sjtadse waordebeuk zeuk me meis vergaefs. En ’t waordebook van Thoear (sjtedje!) verduutsj käörke es ‘snufje’: Ei käörke zaot, zeen ich sjtaon. Det ‘snufje’ zal mit die muuskes mitgezjwómme zien. ’t Waord haet mit sjnoeve, snuiven, snuffelen vandoon. Körrelkes sjnoeve?

Gank daoveur mit nao Ech. Dao knotert moder det d’r nag käörkes sókker op de taofel ligke (waordebook). En waat dach geer van ‘t sjpraekwaord (zelfde waordebook): ouch ein blinj hoon vinjt nag waal ins ei käörke?

Allei: gaot mit die blinj hoon mit nao de waore Limburgse muuskes, die me vreuger veural op jóngessjole zoog: sjpierballe. Oei: zien die ‘balle’ ouch euvergezjwómme? Mót det neet *sjpierbel zien? Nae – sjpierbul kan mesjiens waal. Dees muuskes zólle vaneuver de päöl gekómme zien: klein Muskeln, de sjpiere van de Pruse. ‘t Waord haet via ’t Letien waal get mit ‘moes’ vandoon (dink aan de moes van de handj, die verdieking ónger d’n doem), mae zoeget leut Lidoom links ligke. Laot oos muuskes weer heure en laeze. Ich verzin: (…) menneke mit zien muuskes sjoew in de bloes, den nag minder es eier van ein beginnende pöl. Waem volg…

 

Dit is aoflievering 21 vaan de rubriek Lidioom. Al de veurege aoflieveringe kint geer trökvinde in eus arsjief.

 

← Ga terug