Lidioom: Gevaers nao d’n hiemel

Hemelvaart vandaag. Of Hiemelvaart – of Kriste himmelvaat (mit klein h, Kirchroa). Höbbe veer waal einen eigen aangepasde naam neudig? Hollesje jóngere waal: die zólle det waord ‘vaart’ minder begriepe, den biej häör vare allein nag beut, euver de vaart. Wen me hiej heurt: wie ze mit dem begóste te vare, ich keem neet biej van ’t lache, dan haet det nieks mit eine boot vandoon: ze höbbe dae man sjrikkelik veur de gek gehaoje.

Allei: vare veer nag in auto’s? ’t Waord ‘rijbewijs’ höbbe v’r geweun aangepas. Good te begriepe: ‘vaarbewies’ zól es ei pepeerke (polsbendje) veur de Maas gezeen waere. Mit de fits waerd väöl gevare in Limburg, mae veural in kilomaeters, den de meiste luuj rieje. Röstig laote doon: veer höbbe gein taalpliese.

Ich höb aevel nag ei sjiek vaarwaord, wo ich de pliese waal biejgehaold höb; wie ich nag biej de gezet woor. Jedere mörge tillefonische vergadering mit die van Venlo. De chef dao kalde ins van ‘voortuge’; det vónj ich neet good – verkierd vertaald. Waat mót ’t dan zien?

Nou ja: waem bepaolt? Mae vore haet veur mich veural de beteikenis voedsel geven, voeren of voederen. De AN-beteikenis ‘leiden’ is in ’t Limburgs veure, wie in ’t waord veure en aorlog veure. Voertuigen zien dus ‘veurtuge’, mae ich kal lever van gevaers. ’t Zól zunj zien wen dit waord biej de vergaetwäörd belanjt.

Nag get waat me vore kan: ei mikske. Det zag me taenge peuters: mót ich dich noe ei mikske vore?, en dan begóste die al te lache: det woor kiedele van de kin of net d’rónger.

Ein sjieke oetdrökking nag: wen me genóg mik haet, mót me gein wek gaon zeuke. Zaatvraeters, den ‘wek’ (wègk) is ein anger waord veur mik. Ich vónj wiejer ei mikwaord det nieks mit aete vandoon haet, mae waal mit veure: mikkemik. Sjteit in ’t waordebook van Zitterd: rem aan voertuig; zól oet ’t Frans kómme:  frein mécanique, mae dao kan me bao nieks mie mit. Get veur eine sjtreekroman dae wied veur d’n aorlog sjpeelt, of ei kwizzelwaord.

Ieder aoflieveringe vaan dees rubriek kint geer trökleze in eus arsjief.