Lidioom: Greun verkes

De sjnie is voert, véer kónne ós weer mit alderlei greun gaon besjeftige. ’t Waord ‘greun’ verwies neet allein nao ein kleur, ’t haet ouch beteikenisse wie ónriep, nag neet riep, sumpel. Dao is ein nuuj anger beteikenis biej gekómme, die ich zoe verduutsj: (alles) waat mit ei (baeter) mieljeu vandoon haet. Veer hauwe al de Greune, die greun planne bedinke, en noe (nou ja: vurg jaor mei) zoog ich in Trouw deze kop: ‘Nu al een tekort aan groene vakmensen’, ofwaal…

Ja: waat miense zien det? Hollenjers die zich nag wille boeke veur aerdbeze te plökke? Of zich de henj aop wille riete aan sjtaekbaere ofwaal kroonsjele (sjtaeke ouch). Nae: me mót dinke aan miense die windjmeules reparere, vloere/moere isolere: vakluuj die in ‘de groene sector’ wirke. Of dees beteikenis van greun väöl gebroek geit waere: aafwachte.

Wiezoe? Wachte wies det waord op ’t Journaal kump? Kóm noe: det mótte veer zelf weite. Greun verkes, verzin ich, zien verkes die boeteloupe en es voor noer grei aete det dun oet de buurt kump. En mit de sjörsker aangeveurd waert. Wo dink ich dan aan? Kriege v’r weer voorkrotte? In ein van de Limburgse waordebeuk sjteit: greun sjnieje ofwaal: voor veur knien, koe, geit. Greunvoor dus: graas, gaastóng, klee (klaver), krotteblajer.

Zoe zól me ein taengesjtelling kónne kriege tösse det greunvoor (éin waord) en ‘greun voor’: voor det neet besjpaote is, opgegreujd aone kunsmes. Bietje gezóch mesjiens. Of ein vazel buut? Nae: Lidioom. Ein perbeersel (volges waordebook Zjwame) Oos Taal sjpannender (of rieker) te make. Mit de vraog: is voor (voedsel dus) allein veur dere besjtump?

Geine zal in ei restaurant zegke: det woor lekker voor. Wen me ‘voor’ veur oos aete gebroek, is det negatief: bah mam, waat höbs dich noe weer ineingebriesjeld, det is voor veur de verkes. En greunvoor, gebroek me det al veur ei mingsel van sjlaaj, andievie, peule? Weit ich neet. Euver de päöl waal; Grunzeug, zaet ’t waordebook, is (greun) greunte, kruje, soepegreun. Greun grei dus.

Dit is de zoeväölste aoflievering vaan de rubriek Lidioom. Alle veurege aoflieveringe kint geer trökleze in eus arsjief. In de ierste serie vaan vijftien aoflieveringe weurt oetgelag wat de beteikenis en de bedoeling is vaan Lidioom.